Elion Victory yatangiye kwikorera indirimbo nka Producer

Umuhanzi Elion Victory wamenyekanye cyane mu ndirimbo nka Amafaranga, Mbwiza ukuri, Only one, Ni uko ateye, agiye gutangira gushyira hanze zimwe mu ndirimbo amaze kwikorera ku giti cye nk’umu producer.

Uyu muhanzi usigaye akora ubuhanzi ndetse akanakora akazi ko gutunganya indirimbo z’abandi bahanzi, avuga ko ari imwe mu nzira igiye kumufasha kujya ashyira hanze indirimbo ze mu buryo butamuvunnye cyane.

Muri Studio asigaye akoreramo ya Neptunez Band, Elion avuga ko hari indirimbo zigera ku icumi amaze igihe atunganya, zose akaba agiye gutangira kuzisohora zikurikirana, mu majwi no mu mashusho.

Elion Victory yabwiye Umuseke ko gutunganya indirimbo ari indi mpano ye yavumbuye, akaza guhabwa amahugurwa make n’abasanzwe babikora barimo banamaze kubigiramo uburambe.

Yagize ati “Nari nsanzwe ncuranga piano, na gitari n’ingoma ariko naje gusanga ari byiza ko natangira no kujya nitunganyiriza indirimbo uko mbyifuza, iza mbere ngiye kuzazisohora mu gihe cya vuba.”

Akomeza avuga ko yafashe ingamba nshya zo gutunganya indirimbo nyinshi ubundi agatangira kujya azishyira hanze ataruhuka.

Anavuga ko atenganya kumurika Album ye ya Kane mu kwezi kwa nyuma kw’uyu mwaka ariyo mpamvu agiye kongera imbaraga mu gushyira hanze ibihangano bye bindi.

https://www.youtube.com/watch?v=YRmanqomttc&spfreload=10

Joel Rutaganda

UM– USEKE.RW