The Ben ashobora gukorana indirimbo na Stromae

Mu gitaramo aherutse gukorera i Brussels mu Bubiligi cyo kumurika album ye yise ‘Ko nahindutse’ kitabiriwe n’abantu benshi, gishobora kuba inzira yo kugirana ikiganiro kihariye hagati ya The Ben na Stromae abifashijwemo Nyina bakaba bakorana indirimbo.

Amakuru agera ku Umuseke, avuga ko The Ben wagombaga gusubira muri Amerika ku itariki 08 Werurwe 2016, atari yasubirayo kubera ko yasabwe na Nyina wa Stromae kuba aretse bakazabanza bakabonana.

Uko gushaka ko babonana, byavuye kukuba Miranda Marie Nyina wa Stromae yari aria ho The Ben yakoreye igitaramo. Bityo nyuma baza kugirana ikiganiro cy’ukuntu bazaganira.

Ibi nubwo The Ben yabwiye Umuseke ko ari ibiganiro bisanzwe bashaka kugirana nk’umuntu azi usanzwe ukunda u Rwanda n’abarukomokamo, hari amakuru abyemeza atangwa n’imwe mu nshuti ze.

Mu gihe byaba bikunze bagakorana indirimbo, bikaba ari igikorwa gishobora gutuma na muzika nyarwanda itangira gusakara ku isi dore ko Stromae ari umwe mu bahanzi bakomeye cyane.

Mu gitaramo kidasanzwe yakoreye mu Rwanda mu Ukwakira 2015, Stromae yagaragaje ko ari umuhanga ndetse ni nabwo yashimangiye ko afite inkomoko mu Rwanda ariko nta bwenegihugu agira.

Joel Rutaganda

UM– USEKE.RW