India: Impaka ku buhanga bwa Messi na Cristiano zatumye umwe ahasiga ubuzima

Polisi mu gihugu cy’Ubuhinde yashinje umugabo ukomoka muri Nigeria kwica inshuti ye nyuma yo kutumvikana neza mu mpaka zavugaga ku buhanga bw’ibyamamare muri ruhago, Lionel Messi na Cristiano Ronaldo, ushobora kuba ari uwambere ku Isi hagati yabo.

AFP ivuga ko Michael Chukwuma, w’imyaka 21, yishe akomerekeje Obina Durumchukwu, w’imyaka 34, ku cyumweru mu majyaruguru y’Umujyi wa Mumbai, mu gace kitwa Nallasopara biturutse ku mpaka z’ubuhanga bw’abo bakinnyi, nk’uko byatangajwe n’Umuyobozi wa Polisi yahoo Kiran Kabadi.

Aba bagabo bari bahuriye mu birori byo kwizihiza isabukuru y’amavuko ya Durumchukwu ku wa gatandatu nnijoro, ariko nyuma y’impaka zikaze, ibyari ibirori bihindukamo amarira n’agahinda.

Umuyobozi wa Polisi yagize ati “Aba bagabo babiri bo muri Nigeria bakiri bato, bari mu mpaka zijyanye n’abakinnyi ba football. Umwe afana Messi wa Barcelona FC, undi yafanaga Ronaldo wa Real Madrid. Nyuma y’ibiganiro, havutsemo induru.”

Kiran Kabadi yongeyeho ati “Nyakwigendera (uwafanaga Ronaldo), yateye ikirahuri yari afite mu maso y’uregwa (Michael Chukwuma). Ikirahure cyaramenetse kimukomeretsa buhoro mu maso. Nyuma y’ibyo, uyu uregwa yafashe cya kimene cy’ikirahuri, agitemesha nyakwigendera waje gupfa nyuma kubera kuva amaraso cyane.”

Ubundi se ninde muhanga hagati y’aba bakinnyi?

UM– USEKE.RW