Gushyira hamwe, intwaro y’iterambere rya muzika- U.Selemani

Uwihanganye Selemani ukorera ibikorwa bye bya muzika mu gihugu cy’u Bubiligi, asanga gushyira hamwe hagati y’abahanzi n’abo bakorera ibihangano byabo aribo banyarwanda, aricyo cyonyine cyatuma muzika nyarwanda igira indi sura mu ruhando rw’ibindi bihugu birimo gutera imbere ku isi.

Avuga ko nta munyamahanga uzakunda umuhanzi w’Umunyarwanda cyangwa igihangano cye atamukundishijwe n’umunyarwanda ubwe nk’umwene gihugu.

Uretse rero abanyarwanda guhagarika guhora bajora abahanzi cyangwa bumva ko ntacyo bamaze ahubwo bakabashyigikira, naho nta muhanzi nyarwanda wazigera atera imbere.

Ati “Abanyarwanda nidukunda abahanzi bacu tukabaha agaciro indirimbo zabo tukabafasha kuzamamaza no kuzikundisha n’abanyamahanga aho turi hose, nitubatumire mu bitaramo ngo tubahe udufaranga duke kandi abanyamahanga tubaha akayabo nta kabuza muzika yacu n’abahanzi muri rusange bizagera ku rwego mpuza mahanga”.

N’ubwo adakorera muzika ye mu Rwanda, avuga ko akurikirana ibikorwa by’abahanzi nyarwanda cyane. Ndetse akanemeza ko nta muhanzi afite yavuga ko ayoboye abandi mu Rwanda ko bose bari ku muvuduko umwe.

Abajijwe ku mashusho y’indirimbo yashyize hanze igaragaramo bimwe mu bikoresho bishobora kuba byaramuhenze, yakomeje avuga ko nubwo yahenzwe icyo yifuzaga kugeraho yakizeho.

Mu kiganiro na Umuseke yagize ati “Icyo navuga kuri iyi ndirimbo ni uko nishimira ukuntu yakiriwe n’abafana. Iyi video yaraduhenze ariko ndashimira manager wanjye witwa Barihuta J de Dieu washyizemo imbaraga kugirango isohoke iri ku rwego rwiza.

Nayituye abafana banjye bose muri rusange, cyane cyane abakora akazi ko gutwara abantu ‘Tax men’. Kuko baradufasha cyane nibo batuzanira abafana mu bitaramo bakanabacyura!Niyo mpamvu ari nayo nakoresheje muri ayo mashusho”.

Joel Rutaganda

UM– USEKE.RW