Abanyarwanda ntibaraha ubugeni agaciro bukwiye – Munyemana

Munyemana Albert, umuhanzi ushushanya ‘tableau’, za portrait  n’ibibumbano ‘status’ avuga ko nk’abahanzi bashyira imbaraga nyinshi mu kuzamura ubuhanzi bwabo ariko ngo ntabwo Abanyarwanda barabuha agaciro bukwiye.

Munyemana Albert ukora ‘tableau’ ziryoheye ijisho zizwi nka “tableau relief 3D”, akoresha ibikoresho Nyafurika cyane cyane ibikuze nk’ibiti, n’ibindi.

Ibi, ngo abikoresha kugira ngo yerekane ko ibikoresho by’ibinyafurika, by’umwihariko ibinyarwanda bifite agaciro kandi nta kintu kigomba gupfa ubusa.

Munyemana ngo amaze imyaka irenga 30 akora ubu bugeni, kandi ngo abona abakiliya barimo b’Abanyarwanda n’abanyamahanga baba bashaka ‘tableau’ zo gutangamo impano mu birori n’ubukwe.

Ati “Abantu bishyizemo ko duhenda ariko sibyo, burya tableau ihenda ikurikije igihe imaze uyikora, uko imeze, ibyo ukoresheje n’ubutumwa itanga.”

Uyu muhanzi, avuga ko ubuhanzi bakora bugihura n’imbogamizi nyinshi, ati “Imbogamizi dufite ni uko ibyo dukora abantu batabyumva, Abanyarwanda ntabwo biyumvamo ubugeni, n’abafite amahoteli ntabwo barabyumva.”

Munyemana avuga kandi ko n’abafite Amahoteli, resitora n’izindi nzu zigerwamo n’abantu benshi bakabaye aribo baguzi babo bakuru batarabyumva.

Ati “Ntibarumva agaciro ka decoration (gutaka inzu cyangwa ahantu), kandi ama-tableau dukora uretse ubutumwa anakoreshwa mu ku-decora. Ntabwo barabiha imbaraga ngo bumve ko Hoteli igizwe n’inyubako na decoration.”

Agasaba Abanyarwanda cyane cyane Abanyamahoteli kwibuka ko abantu baturuka hanze baje gusura u Rwanda na Afurika muri rusange, bazanwa no kumenya imico y’Abanyafurika kandi iyo mico y’Abanyafurika ishobora kugaragarira mubyo bakora.

Munyemana asanga ngo Leta yaragaragaje uruhare rwayo mu kubateza imbere, igisigaye ngo n’itangazamakuru rigomba gufasha abahanzi b’ubugeni mu kugaragaza ibyo bakora, nk’uko ribigenze ku bandi bahanzi.

Ati “Njye ibyo nkora ni ibintu bijyanye n’umuco w’abanyafurika n’Abanyarwanda cyane cyane. Abanyamakuru mukwiye kumenyekanisha ibyo dukora, mukababwira ko byabindi bajyaga gushaka ahandi n’aha no mu Rwanda duhari kandi twihagije.”

Iyi tableau agurisha amafaranga y’u Rwanda ibihumbi 700 yayise “Wicika intege ejo uzaronka”, ngo itanga ubutumwa bushingiye kuri kiriya gisiga kiba imusozi cyafashe ingamba yo kujya gushaka amaronko mu mazi.   Ahandi igizwe n’ibintu ubundi bigaragara mu Nyanja.

Ati “Icyo ugambiriye ugomba kugira icyerekezo, ukagira ikizere kandi ugashyiramo imbaraga. Mu buzima ugomba kwiyemeza, kkandi ugafata ingamba, icyo ukora cyose ukagikurikira kandi wizeye ko uzakibona.”

Ibikorwa by’uyu muhanzi, abigaragariza mu buryo buhoraho mu bushyinguro-mashusho ‘gallery’ buherereye ku Kiliziya Chez Micheal, mucyahoze cyitwa Ikaze showroom.

UM– USEKE.RW