Senderi yatoranyijwe mu bahanzi bamamaza agakingirizo ka ‘Plaisir’

SFH Rwanda ni umuryango wita ku buzima mu Rwanda ku nkunga y’Ikigega mpuzamahanga Global Fund. Mu bukangurambaga barimo gukora bwo kurushaho kwigisha abanyarwanda kwirinda agakoko gatera sida n’izindi ndwara, Senderi ni umwe mu bahawe uduce agomba kwamamarizamo ako gakingirizo.

Senderi International Hit ukunze kwiyita intare y’Umujyi, avuga ko bimushimisha cyane kubona mu bikorwa byinshi bya Leta akunzwe kwitabazwa.

Ibi akaba ari nabyo bituma ashimangira ko benshi mu bahanzi nyarwanda bakunze kwiyita ibikomerezwa bakagiye bagaragara muri ibyo bikorwa aho kujya mu bitangazamakuru gusa bivuga ibigwi.

Mu nyandiko ndende yandikiye Umuseke, Senderi yavuze ko yashyizwe mu igeragezwa ngo mu gihe yaba yitwaye neza akaba yanaba ambasadari wa Plaisir mu Rwanda.

Yagize ati “Ndi mu igeragezwa ry’icyumweru na SFH Rwanda. Naritsinda nkaba nagirwa amabasaderi w’agakingirizo ka Plaisir mu Rwanda.

Imwe mu mirenge nahawe gukoreramo, ni Busasamana i Nyanza, Umurenge wa Byimana mu Ruhango n’Umurenge wa Kabaya muri Ngororero”.

Akomeza avuga ko kuba yaratoranyijwe mu bahanzi basaga 1000 bari mu Rwanda, abikesha irushanwa rya Primus Guma Guma Super Star kuko ariryo rituma agira umubare munini w’abafana benshi bigaragarira abantu.

Joel Rutaganda

UM– USEKE.RW