Itsinda rya Two 4Real ryacitsemo ibice

Ku rubuga nkoranyambaga rwa facebook rw’umuhanzi Tk Aidan wakundaga kuririmba mu rurimi rw’ikigande rukoreshwa muri Uganda cyangwa icyongereza muri iryo tsinda, yamaze gutangaza ko atakiri muri iryo tsinda.

Mu magambo yanditse, yasabye buri muntu wese uri busome ubwo butumwa adakwiye kumuhamagara amusobanuza neza ahubwo akwiye kunyurwa n’ibyo ari busome.

Bimwe mu byo yatangaje yagize ati “Nshuti n’abavandimwe, nizere ko Imana ikibarize neza. Nifuzaga kuba nafata uyu mwanya ngo mbashimire urukundo ndetse n’umufasha mwagerageje kwereka itsinda rya Two 4Real.

Nk’itsinda, hari byinshi twagezeho nko gukura mu buhanzi, kwandika indirimbo, kwigirira icyizere, kwagura umubano n’ibindi.

Ndashimira abantu bose batubaye hafi kuva mu mwaka wa 2008 kugeza umwaka ushize. Muri 2016 nifuje guhindura ibyo nkora byose mu muziki no mu buryo bw’umwuga umunsi ku munsi.

Ndifuza kutazagendera ku musaruro itsinda ryacu ryagezeho, reka buri wese yubake ibye. Nta rirarenga kandi ubuzima burakomeza”.

Itsinda rya Two 4 Real ubusanzwe ryabarizwagamo Tk Aidan na Dj Pius bahuye mu mwaka wa 2008 ari nabwo bishyize hamwe nk’itsinda.

Baje gukora indirimbo nyinshi zitandukanye zirimo, Agakayi, Imitobe, That Love ft General Ozzy wo muri Zambia uvukana na Roberto n’indi yakunzwe cyane yitwa ‘Kanda amazi’.

Amakuru agera ku Umuseke, avuga ko n’ubwo aya makuru aribwo agitangazwa, ahubwo bari baranze kwishyira hanze ariko gutandukana hagati yabo byari byarabaye kera.

Bikavugwa ko bashobora kuba baratandukanye nyuma yo kumurika album yabo ya mbere bakoze ibitaramo bitandukanye i Kigali n’i Musanze mu Ruhengeri.

Joel Rutaganda

UM– USEKE.RW