Dream Boys yakoranye indirimbo ya gatanu na Jay Polly

*Kuba ari umuraperi mwiza

*Kuba indirimbo zose Jay Polly yakoranye nabo zarakunzwe

*No kuba akunzwe cyane, ngo nibyo bituma Dream Boys imaze gukorana nawe indirimbo eshanu zose.

Mu mwaka wa 2008 nibwo itsinda rya Dream Boys ribarizwamo Nemeye Platini na Mujyanama Claude cyangwa se TMC bahuye na Jay Polly bakorana indirimbo bise ‘Mpamiriza ukuri’.

Nyuma y’aho baza gukorana izindi zirimo ‘Mumutashye, Sinzahinduka, Kanda amazi, ndetse na ‘Birarangiye’ bamaze gukora igiye gushyirirwa hanze amashusho mu minsi ya vuba.

Imwe mu mpamvu ngo itumye kugeza ubu aribo bahanzi bamaze gukorana indirimbo nyinshi kandi badahuriye mu itsinda, ni uburyo bw’imibanire iri hagati yabo.

Mu kiganiro na Umuseke, Nemeye Platini yatangaje ko nta ndirimbo n’imwe bari bakorana na Jay Polly ngo ibabere impfa busa. Ko ariyo mpamvu badakunze cyangwa se bataragerageza abandi baraperi.

Yagize ati “Jay Polly twahuye kera cyane umuntu ataragira izina rikomeye. N’aho tumenyekaniye umubano wacu wakomeje kugenda urangwa n’ibyiza gusa.

Nibyo bitumye kugeza ubu ariwe muraperi tumaze gukorana indirimbo nyinshi mu Rwanda kuko nta n’imwe turakorana ngo abafana bacu ntibanezeze.

Mpamya neza ko kuri ubu abakunzi bacu, abe ndetse n’abakunzi ba muzika muri rusange bakwiye kudushyigikira bakayigeza kure hashoboka”.

Itsinda rya Dream Boys niryo tsinda kugeza ubu ritari ryabura mu irushanwa rihuza abahanzi bakunzwe mu Rwanda rya Primus Guma Guma Super Star.

Dore ko n’ubwo batararyegukana ariko batari bajya munsi y’imyanya itatu ya mbere. Kuri ubu nyuma y’aho bariherutsemo mu mpera za 2015, bamaze gukora indirimbo zisaga enye nyuma yaryo.

Joel Rutaganda

UM– USEKE.RW