Senderi yise imbwa ye izina rya’ Micomyiza ‘

Micyomyiza Susuri ni izina Senderi yise imbwa ye ubusanzwe iryo zina rifitwe na mugenzi we bahora bahanganye mu njyana ya Afrobeat witwa Micomyiza Prosper uzwi nka Mico The Best. Ikintu cyatangaje benshi bamenye iby’iyi nyarubwana ya Senderi yitiranywa n’umuhanzi mukeba.

Izina ry’iyi mbwa ngo ryaba ryaratanzwe n’umuhanzi Amag The Black ari nawe Senderi yaciririyeho iyi mbwa.

Senderi yabwiye Umuseke ko impamvu yayise iryo zina ari uko iyo mbwa ifite imico myiza nyuma yo kuyihabwa ifite amahane.

Yagize ati “Imbwa yanjye nayise iryo zina rya Micomyiza ni ukubera ubwitonzi ifite. Ntabwo nayigereranyije na Mico The Best ukora muzika kuko sinanjye wayiryise ni Amag The Black wabitangiye”.

Ku ruhande rwa Amag The Black uvugwa kuba yarise imbwa ya Senderi izina rya Micomyiza, yamaganye ibyo Senderi avuga ahubwo ashimangira ko afite impamvu yayise iryo zina.

Yagize ati “Sinigeze nita imbwa ya Senderi izina rya Micomyiza. Oyaa!!! Ahubwo adakomeza kumbeshyera. Njye namuhaye imbwa mubwira ko ifite imico myiza nta makari igira. Ibindi niwe uzi impamvu yabikoze”.

Ibi bamwe babifashe nk’ubushotoranyi Senderi yakoreze kuri Mico The Best, Mico ariko we avuga ko ntacyo bimubwiye ko icyo agamije ari ugukora muzika atari muri ibyo byo guterana amagambo.

Mico yagize ati “Igihe kizagera abafana ba muzika nyarwanda abe aribo bagira icyo bakora ku bikorwa bya Senderi.

Njye nta kintu na gito nabivugaho icyo ngamije ni ukurushaho gukora ibyateza imbere muzika nyarwanda nanjye muri rusange”.

Joel Rutaganda

UM– USEKE.RW