Step Up Entertainement Media Group igiye kujyana TNP mu rukiko

Imwe mu ma kompanyi ‘Company’ ategura ibitaramo by’abahanzi mu Rwanda izwi nka Step Up Entertnainement Media Group, igiye kugeza ikirego mu rukiko iregamo itsinda rya TNP kuba yarize umushinga w’igitaramo barimo gutegura nyuma bagashiduka batakiri mu gikorwa.

Iyo kompanyi ngo yatangiye gutegura uwo mushinga w’igitaramo cyo kumurika album yabo bise ‘Kamere’ muri Kanama 2015. Bityo nyuma baza gusanga batakiri mu bategura icyo gitaramo ahubwo byarinjijwemo abandi.

Mu kiganiro na Umuseke, Ishimwe Nixon umwe bari muri uwo mushinga wo gutegura icyo gitaramo avuga ko bamaze kwegeranya ibimenyetso byose ku buryo bagiye kujya mu nkiko.

Yagize ati “Itsinda rya TNP tumaze igihe kinini cyane dukorana ibikorwa byinshi bitandukanye. Kuri iyi nshuro twatunguwe no kubona mu mushinga twari kumwe wo gutegura igitaramo twarigijwe hirya.

Byaje kugera aho uwitwa Trecy aza kudusura nkuko byari bisanzwe naho azanywe no kwiba flash yari iriho imishinga myinshi twari dufite mu minsi iri imbere.

Gusa amahirwe ni uko hafi ya byose twari tubifite kuri computer y’akazi. Twaje gutangara rero tubonye badukura muri uwo mushinga bagashyiramo abandi naho ni uko bari baribye umushinga wose uko wari umeze.

Bityo rero niyo mpamvu tugiye kubageza mu rukiko ngo turenganurwe noneho ubwo nabo bashobora kuba bafite ibibarenganura wenda”.

Itsinda rya TNP ribarizwamo Paccy na Trecy bivugwa ko bibye umushinga w’igitaramo barimo bategurirwa, bavuga ko ari ikibazo kindi batazi gishobora kuba kiri inyuma y’ibyo.

Trecy yagize ati “Ntabwo turi abajura. Ikindi ni uko niba koko bafite ibyo bazerekana mu rubanza bigaragaza ko aritwe twibye uwo mushinga turiteguye kuburana”.

Step Up Entertnainement Media Group ikomeza ivuga ko mu gihe TNP yaba itabahaye amafaranga agera ku bihumbi 450.000 frw y’inyigo y’uwo mushinga kuri uyu wa kabiri aribwo bari bugeze ikirego mu rukiko.

Joel Rutaganda

UM– USEKE.RW