Miss Joannah yerekeje muri Afurika y’Epfo

Keza Bagwire Joannah nyampinga w’Umuco 2015 yerekeje muri Afurika y’Epfo mu irushanwa rya banyampinga bose ku isi b’Umuco ryiswe ‘Miss Heritage World 2015’, mu gihe yaba yitwaye neza ashobora kwegukana amadorali 20.000 USD.

Mu ijoro ryo kuri uyu wa kane tariki ya 13 Ugushyingo 2015 rishyira iryo ku wa gatanu ‘01h00’, nibwo yahagurutse ku kibuga cy’indege i Kanombe.

Muri urwo rugendo akaba yaherekejwe na Kagame Ishimwe Dieudonné umuyobozi wa Rwanda Inspiration Back Up ikigo gifite isoko ryo gutoranya nyampinga w’u Rwanda.

Ibi ariko mbere yo guhaguruka bakaba batangaje ko bagiye mu irushanwa ritoroshye rikeneye ubufasha n’amasengesho.

Imwe mu mbogamizi bari bafite, ni uko abandi bamaze icyumweru cyose muri Afurika y’Epfo mu myiteguro. Ibi bikaba byaratewe nuko abateguye iryo rushanwa batari bafite ubushobozi buhagije bwo gutwarira ba nyampinga icya rimwe.

Bikaba biteganyijwe ko uwo muhango uzaba ku cyumweru tariki ya 15 Ugushyingo 2015. Bakazagaruka mu Rwanda ku wa mbere w’icyumweru gitaha.

Dore uko ibihembo bizatangwa: Miss Heritage World azegukana amadorali 20.000 $.

Igisonga cya mbere (1st runner Up) kizegukana amadorali 10.000 $

igisonga cya kabiri (2rd runner Up ) cya Miss Heritage World kizegukana 5000 $ hakazanatangwa( Special Award) igihembo cyihariye cy’uzegukana  iryo rushanwa cy’amadorali 1000 $.

Iryo rushanwa bikaba biteganyijwe ko rizabera ahitwa Sandton Convention Center Johannesburg muri Afurika y’Epfo.

Joel Rutaganda

UM– USEKE.RW