The Ben na Priscilla bagiye gukorana indirimbo

Mugusha Benjamin wamamaye nka The Ben muri muzika na Princess Priscilla bagiye gukorana indirimbo nyuma yo guhuriza ahamwe icyo gitekerezo buri umwe akacyakira neza.

Ni ubwa mbere aba abahanzi bombi bagiye gukorana indirimbo mu gihe buri umwe yari amaze gukorana n’abandi bahanzi nyarwanda baba muri Leta Zunze Ubumwe z’Amerika.

Priscilla yagiye yumvikana mu ndirimbo afatanyije na Meddy ndetse n’indi arimo gukorana na Lick Lick itari yajya hanze. Mu gihe The Ben yakoranye na Meddy, K8 Kavuyo na Adrien.

Mu kiganiro na Umuseke, The Ben yatangaje ko imwe mu mpamvu agiye gukorana na Priscilla ari uko ari umwe mu bahanzikazi nyarwanda bazi kuririmba kandi unakunzwe muri iki gihe.

Yagize ati “Priscilla amaze kugera ku rwego buri muhanzi wese yakwifuza gukorana nawe. Kuko urebye uburyo akoresha ijwi rye, ndetse n’imiririmbire ye byerekana ko amaze kugera ku rwego rwiza.

Uretse n’ibyo kandi, benshi mu bakunzi bacu bagiye babidusaba ko twakorana indirimbo. Niyo mpamvu rero ubu turimo gutegura ikintu kizashimisha abanyarwanda bose bakunda muzika nyarwanda”.

The Ben abajijwe noneho impamvu atangiye gukora ibitaramo hanze ya Amerika, dore ko ateganya gukorera igitaramo mu gihugu cy’u Bubiligi mu mwaka wa 2016 muri Werurwe, yavuze ko ibyo yari ahugiyemo bisa naho byarangiye.

 Joel Rutaganda

UM– USEKE.RW