“U Rwanda rufite abahanzi bakorera kujya mu marushanwa gusa”- Alain Muku

Alain Mukuralinda umuvugizi w’ubushinjacyaha bukuru bw’u Rwanda akaba n’umwe mu bahanzi bamenyekanye cyane mu Rwanda, avuga ko mu Rwanda hari abahanzi benshi bakorera kujya mu marushanwa aho kuba hari indoto zindi bafite zo guteza imbere muzika nyarwanda cyangwa nabo ku giti cyabo bagatungwa n’ibihangano bakora.

Mu kiganiro n’abanyamakuru cyo kuri iki cyumweru tariki ya 13 Nzeri 2015 ubwo herekanwaga abana bo muri Hanga Higa umwe mu mishanga ufite gahunda yo guteza imbere ibihangano by’umuco nyarwanda kuruta kumenyekanisha iby’amahanga, Alain Mukuralinda yavuze ko u Rwanda rutaragira abahanzi bahamye.

Ibi ahanini ngo bikaba biterwa n’umubare munini w’abahanzi bajya mu ma studio gukora indirimbo kubera ko hari irushanwa runaka ryegereje ariko mu bindi bihe ugasanga batumvikana.

Yagize ati “Birababaje cyane kubona abahanzi nyarwanda bacyumva ko bakora indirimbo kubera ko hari irushanwa runaka ryegereje. Mu yindi minsi ugasanga batumvikana.

Ibi byose bigaragaza ko hagisabwa igihe kinini cyo kuba u Rwanda rwagira umuhanzi umwe ushobora kuruhagararira rukamenyekana nk’igihugu gifite umwihariko mu muziki w’umwimerere.

Kuko usanga abahanzi benshi mu Rwanda bakora injyana z’ibindi bihugu. Ese bibaza ko bazatumirwa ngo baze mu bitaramo bakora injyana z’abandi kandi bene kuzikora birirwa bazibyina?

U Rwanda rufite abahanzi b’abahanga ariko batazi ibyo bashaka!!nibaza ko ukoze hagize umuhanzi ukora indirimbo nziza mu kinimba cyangwa mu mishayayo akaba ariyo style akora aribwo yakwitwa umuhanzi nyarwanda”.

Alain Mukuralinda watangiye umushinga wo guteza imbere muzika nyarwanda mu cyo yise ‘Hanga Higa’, abamaze gutoranya abana bagera ku icumi agiye gutoza gukora ibihangano by’umuco aho kwibanda ku bindi.

Yakomeje avuga ko nta nyungu areba vuba aha, ariko ko u Rwanda mu gihe cya vuba rushobora kubona bamwe mu bahanzi bazi icyo guhanga ndetse no kuba umuhanzi bisobanura.

Joel Rutaganda

UM– USEKE.RW