Ruhango: Ishuri VTC Mpanda rikomeje kwigisha urubyiruko guhanga imirimo

Ishuri ry’imyuga n’ubumenyingiro ry’i Mpanda(VTC Mpanga) ryo mu murenge wa Byimana, mu karere ka Ruhango, ryatangije gahunda  yo kurwanya ubushomeri  mu rubyiruko  rwarangije amashuri yisumbuye, ndetse n’abandi batagize amahirwe yo gukomeza amasomo yabo ngo bayasoze neza.

Iyo gahunda isanzwe iri mucyo Leta yise  National Employment Program(NEP) igamije gufasha urubyiruko rutagize amahirwe yo kurangiza amashuri yisumbuye ndetse  n’abayarangije  ariko  batabashije gukomeza  kwiga  amashuri makuru na Kaminuza kwiga imyuga itandukanye  izabafasha kwihangira imirimo bagaha n’abandi akazi.

Mu kiganiro Umuseke yagiranye n’umuyobozi w’ishuri  ry’imyuga n’ubumengiro ry’i Mpanda, Ndangamira  Gilbert, yavuze ko  iyi gahunda  Leta yayishyizeho  mu rwego rwo  kugabanya ubushomeri  bukunze kugaragara kuri bamwe mu rubyiruko bize  amashami atabemerera  kubona akazi vuba, ariko bagahugurwa mu gihe cy’iminsi  mike  mu bijyanye n’imyuga kugirango babashe kwihangira imirimo.

Uyu muyobozi akomeza avuga ko umubare w’abanyeshuri barangije mu yandi mashami atari ay’imyuga ari benshi kandi bakaba aribo batinda kubona akazi.

Kuri we ngo iyi  gahunda re izagabanya  ubushomeri  kubera ko ngo abazarangiza muri aya mashuri y’imyuga  bazashyira ubumenyi bahawe mu bikorwa bityo akazi kakaboneka.

Yagize ati: “Urubyiruko rudafite akazi, ni rwinshi  kandi ubu Leta irimo gushishikariza  abanyeshuri kwiga  amashuri y’imyuga kugira ngo  bihangire imirimo, kandi mbona abize aya mashuri  babona imirimo”

Iradukunda Jean Damascène yiga mu Ishami ry’ubwubatsi(Construction) avuga ko yize   umwaka wa mbere n’uwa kabiri w’amashuri yisumbuye ariko aza kubura ubushobozi bwo gukomeza.

Nyuma ngo yamenye ko iriya porogaramu yatangijwe  ahita afata icyemezo cyo kwiga  umwuga w’ubwubatsi cyane cyane ko  kwiga ari ubuntu.

Ngo igihe gito asigaranye ngo arangize,  ubumenyi  afite  bushobora kumwemera kujya ku isoko ry’umurimo.

Umwe mu bakobwa biga iyi myuga witwa Uwimana Claudine avuga ko kwiga amashuri y’imyuga byabanje kumetera ipfunwe kubera ko bagenzi be  bamusekaga bitwaje ko  ngo umukobwa adashobora kurira  igikwa ngo yubake  kubera ko  umwuga w’ubwubatsi akenshi  wafatwaga nk’umwuga  w’abagabo.

We yemeza ko izo nzitizi yazirenze kandi ngo iriya  myumvire ishingiye  ahanini ku bitekerezo bishaje.

Muri iri shuri ry’imyuga n’Ubumenyengiro ry’i Mpanda ryigwamo abanyeshuri  barenga 300 muri bo 166  nibo  bashyiriweho iyi porogaramu yo kwiga  k’ubuntu.

MUHIZI ELISEE

UM– USEKE.RW-Ruhango.