Uganda: Umudepite asanga Museveni ari nka Yesu Kristu

Ubwo yagezaga ijambo ku Bakristu bo mu gace ka Kigezi ku munsi w’ejo, uwungirije umuvugizi w’Inteko ishinga amategeko ya Uganda witwa Jacob Oulanyah  yavuze ko President Museveni asanga ari nka Yesu Kristu umwana w’Imana wigomye aho yabaga mu ijuru akaza  gupfira ibyaha by’abanyabyaha ngo bazabone ‘ubuzima bw’iteka’.

Abivuga hari mu muhango wo kwizihiza Yubile y’imyaka 80 Kiliziya ya The revival of Christianity in East Africa, yari imaze ishinzwe.

Oulanyah yavuze ko kugereranya Museveni na Yesu Kristu biterwa n’uko yaretse amadini yose akisanzura muri Uganda bityo abayarimo bakazabona ubuzima buhoraho.

Yagize ati:“ Hari igihe muri Uganda abantu babuzwaga gusenga cyangwa gusengera aho bashaka  ariko Museveni yaraje n’ishyaka rye NRM baha buri wese uburyo bwo gushyikirana n’Imana no kuyisenga ntawe uhutajwe.”

Yabasabye ko bakomeza kubera Museveni indahemuka bakamugira intwari yabo yabafashije gushyikirana n’Imana.

Oulanyah yongeyeho ati: “ Iyo twitegereje muri iki gihe ukuntu amadini atuma abantu bahinduka bakaba beza mu muryango w’abantu bitwereka ko mbere muri iki gihugu abantu bari bararenganyijwe, nta bwinyagamburiro kandi byagiraga ingaruka ku mutuzo w’abantu.”

Muri uriya muhango harimo abahagarariye u Rwanda na Kenya nk’uko Daily Monitor yabyanditse.

UM– USEKE.RW