Nyarugenge: Urukiko rwanzuye ko umukozi wa RBC afungwa iminsi 30

Mu rubanza Ubushinjacyaha bukurikiranyemo Umukozi wa RBC kugambirira kunyereza amafaranga ibihumbi 150,  kuri uyu wa 06 Kanama Urukiko rw’Ibanze rwa Nyarugenge rwategetse ko uyu mukozi hamwe n’undi baregwanwa baba bafunzwe iminsi 30 bagakurikiranwa bafunze kuko hari impamvu zikomeye zituma bakekwaho icyaha.

Ni icyemezo cyasomwe abaregwa (Kampayana Richard na Sadiki Thierry) badahari, umucamanza akaba yavuze ko mu bimaze kugerwaho mu iperereza bigaragaza ko hari ibimenyetso bigize icyaha  aba bombi bakurikiranyweho bityo kuba bakurikiranwa bari hanze bishobora kwica iperereza cyangwa bagatoroka ubutabera.

Umucamanza yavuze ko Urukiko rufite urwandiko rw’inzira (feuille de route) mpimbano rwashyizweho umukono n’umukozi w’Ikigo cy’igihugu gishinzwe ubuzima uyu akaba ari Kampayana Richard nk’uko byemejwe n’umuhanga mu gusuzuma inyandiko.

Urukiko runafite inyandiko igaragaza ko Kampayana yaragiye kwishyuza mu kigo SGES gifitanye amasezerano  na RBC yo kuyitwarira abakozi.

Kimwe no kuba RBC yari yasinye Sheki kugira ngo hishyurwe ibihumbi 150 nyuma bikaza kuvumburwa ko inyandiko zakozwe hakwa aya mafaranga ari impimbano, umucamaza yavuze ko ibi byose ari impamvu zigaragaza ko gukeka  Kampayana ho icyaha bifite ishingiro.

Ku ruhande rwa Sadiki Thierry ukorera SGES,  umucamanza yavuze ko kuba yarujurije Kampayana Richard urwandiko rw’inzira (feuille de route) rutazwi akanagena umushoferi utazwi ari impamvu zikomeye nawe zituma akekwaho icyaha.

Ingingo ya 89 n’iya 106 byo mu gitabo cy’amategeko yerekeye imiburanishirize y’imanza z’inshinjabyaha zivuga ku ifunga n’ifungura by’agateganyo zigaragaza ko iyo hari impamvu zikomeye zituma uregwa cyangwa abaregwa bakekwaho icyaha, umucamanza ategeka ko bakurikiranwa bafunze iminsi 30.

Umucamanza yavuze ko mu rwego rwo kugira ngo aba bombi (Kampayana Richard na Sadiki Thierry) bazage babonekera igihe mu gihe cy’iperereza ndetse ko hari impungenge z’uko bashobora gutoroka ubutabera bityo yemeza ko bagomba gukurikiranwa bafunze kuko n’impamvu batanze basaba gukurikiranwa bari hanze nta shingiro zifite.

Kampayana Richard ukorera ikigo cy’igihugu gishinzwe kwita ku buzima RBC akurikiranyweho gukora no gukoresha inyandiko mpimbano agamije kunyereza umutungo wa Leta; naho Sadiki Thierry bareganwa hamwe we akurikiranyweho ubufatanyacyaha.

Ikigo cy’igihugu gishinzwe ubuzima RBC cyakoreshaga uyu mugabo uri gukurikiranwa gushaka kunyereza 150,000 Rwf giherutse kwitaba Abadepite bagize Komisiyo ikurikirana imicungire n’imikoreshereze y’imari ya Leta(PAC) kugira ngo kisobanure kuri za miliyari zakoreshejwe nabi izindi zikanyerezwa.

Mu minsi ishize abaregwa bari bafunganywe na bagenzi babo barindwi ariko bo bafunguwe kuri uyu wa Kabiri.

Kampayana Richard ubwo yisobanuraga kuri uyu wa gatatu, yavuze ko kumushinja gushaka kunyereza ibihumbi 150 ari ugushaka kujijisha kuko we n’umugore we ngo bahembwa arenga miliyoni bityo ngo ntiyakwandavurira ayo bamushinja.

Kuri we ngo bikorwa n’abantu bashaka kujijisha kubera amafaranga abarirwa mu miliyari ngo bagize uruhare mu kunyereza.

Martin NIYONKURU

UM– USEKE.RW