Nimara gukira neza nzagaruka iwacu kuvuganira Abarundi- Mbonimpa

Nyuma y’uko arashwe agakomereka kw’itama ariko Imana igakinga akaboko, Pierre Claver Mbonimpa ukuriye umuryango uharanira uburenganzira bwa muntu ndetse n’ubw’abagororwa mu Burundi yaraye afashe indege  ajya kwivuriza mu Bubiligi. Yavuze ko namara gukira neza azagaruka gukomeza kuvuganira uburenganzira bwa muntu mu Burundi.

Nyuma yo kuraswa Mbonimpa yajyanwe mu bitaro Bumerec de Bujumbura kuvuzwa atangira kwitabwaho kandi ngo ubuzima bwe bumerewe neza muri rusange.

Umushinjacyaha mukuru wa Repubulika, Arcade Nimbona yafashe umwanzuro wo gukuraho icyemezo cyo gukomanyiriza Claver Mbonimpa ngo ntazarenge imipaka y’Uburundi, iki cyemezo cyari cyarafashwe muri 2013 ubwo Mbonimpa yasohoraga raporo yerekana ko hari insoresore z’Abarundi zijya kwitoreza muri DRC.

Umukobwa we Amandine Nasagarare yabwiye abanyamakuru ko umuryango we wishimiye ko Mbonimpa agiye kwivuza kandi ko azakira neza kurusha akagaruka mu rugo vuba.

Nyuma yo kuraswa kwe kwaje gukurikira urupfu rwa Gen Adolphe Nshimirimana wishwe ku Cyumweru taliki ya 02, Kanama, amahanga yavuze ko ibiri kubera mu Burundi bishobora kuvamo intambara kuko ngo bigaragara ko hari abaturage bafite intwaro bagamije kwica bamwe mu bantu bakomeye mu Burundi.

Mu ijoro ryakeye i Bujumbura humvikanye urusaku rw’amasasu na za Grenade bivugwa ko iyi mirwano yahuje Polisi n’abantu runaka, ubu abashinzwe umutekano bakaba bari gusubiza ibintu mu buryo.

Mu kiganiro n’abanyamakuru cyabaye kuri uyu wa Gatatu, Umuvugizi wa Police y’u Burundi wungirije Pierre Nkurikiye yavuze ko hari abantu batunze intwaro kandi bashaka kwica abantu bakomeye muri Politiki bakabyitira inzego z’umutekano, bityo ngo izi nzego zigomba gukorana hafi kugira ngo zihashye bariya bantu.

UM– USEKE.RW