Uwunganira Mugesera yabuze. Urukiko, Ubushinjacyaha na Mugesera ubwe ntibazi ibye

“Kuva kwa kane mvuye aha kugeza uyu munsi kuri iyi saha ntituravugana, ntituranabonana”

Mu gitondo cyo kuri uyu wa 03 Kanama, Mugesera ukurikiranyweho n’Ubushinjacyaha bw’u Rwanda ibyaha bya Jenoside, yabwiye Urukiko ko atazi amakuru y’umwunganira mu mategeko, ibi byatumye urubanza rusubikwa kuko Urukiko kimwe n’Ubushinjacyaha nabo batazi amakuru y’uyu mugabo.

Mu iburanisha riheruka, Me Jean Felix Rudakemwa nabwo ntiyagaragaye mu iburanisha kubera uburwayi nk’uko yari yabimenyesheje Urukiko ndetse ko yari yahawe ‘Repos medical’ y’iminsi ine ari nayo ntandaro yo kuba Umucamanza yari yimuriye iburanisha kuri uyu wa mbere.

Kuri uyu wa mbere; Mugesera ukurikiranyweho kuba umwe mu bashishikarije Abahutu kwanga Abatutsi yongeye kugaragara mu cyumba cy’Iburanisha atunganiwe, abwira umucamanza ko yarinze ava aho afungiye atamenye amakuru y’umwunganira.

Ati “kuva kuwa kane mvuye aha mu rukiko kugeza uyu munsi; kuri iyi saha sindabonana na we (Avoka); sindanavugana na we.”

Mugesera yabwiye Umucamanza ko ntako atagize ngo amenye amakuru ya Avoka we, ati “kuwa kane mvuye aha nageze kuri Gereza naka telefoni ngira ngo mwifurize kurwara ubukira, namuhamagara hakaza igisubizo kivuga ngo nzongere guhamagara nyuma,..kuwa Gatandatu nongeye kumuhamagara nabwo ndamubura.”

Umucamanza yavuze ko mu gitondo cyo kuri uyu wa mbere Urukiko na rwo rwagerageje guhamagara Me Rudakemwa kuri telefoni bagasanga itariho.

Ubushinjacya nabwo ngo ntibuzi icyatumye Me Rudakemwa atitaba kuko atigeze abimenyesha nk’uko yari asanzwe abigenza yifashishije inyandiko cyangwa ubutumwa kuri internet (email).

Uregwa abajijwe icyakorwa; nk’ibisanzwe iyo adafite umwungunira yavuze ko adashobora kuburana atunganiwe ndetse bishimangirwa n’Ubushinjacyaha buvuga ko kunganirwa ari uburenganizra bwe bityo akaba ataburana atunganiwe.

Mugesera akeka Avoka we yaba ari mu biruhuko

Uyu mugabo ukurikiranyweho kugira uruhare ruziguye mu gucura umugambi wa Jenoside yabwiye umucamanza ko yigeze kuganira na Avoka we akamubwira ko ukwezi kwa Kanama (08) kuba ari ikiruhuko ku bakora mu rwego rw’ububutabera bityo akaba akeka ko ariyo ntandaro yo kubura kwa Me Rudakemwa.

Ati “…yambwiye ko ukwezi kwa munani kuba ari ikiruhuko cy’ubutabera n’ababukoramo, nkeka ko ashobora kuba yaragitangiye.”

Umucamanza amubajije niba hari amakuru yaba abifitiye ku buryo byanashingirwaho hafatwaho icyemezo; Mugesera yavuze ko atabishingiraho ariko byashoboka.

Iburanisha ryimuriwe ku itariki ya 07 Nzeri uruhande rw’uregwa rutanga imyanzuro ya nyuma y’Urubanza banagira icyo bavuga ku gihano cyo gufungwa burundu uregwa aherutse gusabirwa n’Ubushinjacyaha.

Martin NIYONKURU
UM– USEKE.RW