Karongi: Aravugwaho kwica umwana we w’amazi abiri

Mu ijoro ryakeye mu Karere ka Karongi, Umurenge wa Mutuntu, Akagali ka Byogo , Umudugudu wa Gasenyi haravugwa umukobwa witwa Uzakira Rodhia bivugwa ko yishe umwana we w’amazi abiri ngo kuko yatumaga adakora uburaya neza.

Uyu mukobwa  bivugwa ko ari mu bigurisha bita indaya  ejo bamubonye ku gasanteri ahetse umwana we. Ariko ngo nyuma ari mu kabari yaje kuganira bagenzi be ko uriya mwana atari bumurarane kuko ngo amubuza abakiriya.

Umuyobozi w’umudugugu wa Mutuntu, Nsengimana Yasoni yabwiye Umuseke ko bamwe mu bakobwa bakorana uburaya n’uwo bivugwa ko yihekuye baje kumubwira mu gicuku ko umwana wa Rhodia yapfuye.

Ati: “Nagezeyo koko nsanga yapfuye mbajije umukobwa ansubiza ko yazize kuruka no guhitwa.”

Abakobwa bagenzi ba Rhodia bavuga ko ngo yishe uruhinja rwe rwendaga kuzuza amezi abiri arukubise umugeri ndetse no arujugunya no muri ruhurura ntoya ‘iri hafi aho’.

Nsengimana yavuze ko umwana bishoboka ko yoherejwe ku bitaro bya Kibuye gupimwa ngo barebe icyamwishe bityo byaba byiza bategereje ibisubizo bya muganga.

Umuseke wahamagaye umunyamabanga nshingwabikorwa wa Gitesi ngo atubwire niba hari ibisubizo  bya muganga byabonetse ntiyabasha kwitaba telefoni.

UM– USEKE.RW