Nyamata: Ihuriro ry’abakobwa bayoboye muri za Kaminuza baremeye abamugariye ku rugamba

Kuri iki cyumweru abakobwa bibumbiye mu muryango w’abakobwa bahoze bayobora muri za Kaminuza ndetse n’abakiyobora ‘The Girls Leaders Forum (GLF) basuye abahoze ari ingabo z’u Rwanda bamugariye ku rugamba batuye mu murenge wa Nyamata mu mudugudu wa Nyaruvumu  mu Bugesera.

Umuyobozi wa Girls Leaders Forum wungirije ku rwego rw’igihugu Umutoniwase Ange yabwiye Umuseke ko iki gikorwa kiri mu rwego rwo gushimira ingabo zabohoye u Rwanda bityo bahisamo kubaremera.

Ubundi ngo byari bube byiza iyo baza gukora iki gikorwa mu minsi 100 yo Kwibuka ariko ntibyakunda kubera impamvu zitandukanye.

Umutoniwase mu  ijambo rye yavuze ko mbere  yo kuza kuremera abamugariye ku rugamba bo muri Nyamata, umudugudu wa Nyaruvumu, babanje kwiga uko Jenoside yakorewe Abatutsi yateguwe, uko yashyizwe mu bikorwa ndetse n’uko ubu u Rwanda ruri kwiyubaka ariko ngo baza gusanga byaba byiza bamenye n’uko yahagaritswe.

Kuri bo ngo ni isomo rikomeye kumenya uko ingabo zahoze ari iza RPA zahagaritse Jenoside ubu Abanyarwanda bakaba bafite amahoro asesuye.

Basezeranyije abasuwe ko bazakomeza kubaba hafi uko ubushobozi buzajya buboneka kose.

Uwavuze mu izina ry’imiryango yasuwe yashimiye aba bakobwa kubera ubushake bagize bwo kuza kubafasha abasaba gukomeza uwo mutima.

Yavuze ko kuba barabohoye igihugu aribyo by’ingenzi  kurusha ko bamugariye ku rugamba kuko intego yabo bayigezeho.

Ati: “ Mu by’ukuri twakoze akazi gafitiye igihugu akamaro kandi twishimira ko ubu Abanyarwanda babayeho bafite umutekano. Urugamba rw’amasasu twararurangije ariko turabasaba ko mwafatanya natwe tukarwana urugamba rwo kwigobotora ubukene n’ubujiji.”

Umunyamabanga nshingwabikorwa w’umurenge wa Nyamata, Gashumba Jacques yibukije abashyitsi n’abasangwa ko akazi ingabo zakoze zibohora igihugu kagomba guhora kibukwa kandi ibyagezweho bigakomeza kurindwa.

Uyu muyobozi yabwiye Umuseke ko igikorwa cyakozwe na Girls Learders Forum cyagombye kubera n’abandi urugero, bakajya begera abantu bamugariye ku rugamba kuko ngo ari ‘inkunga ibubaka mu mitima’ bakumva ko ubwo babohoraga igihugu bagize neza kandi hari ababiha ‘agaciro kabyo’.

Nyuma yo kuganira no gusangira hagati y’abashyitsi n’abasangwa, abagize GLF bashyikirije abo baje gusura inkunga babageneye irimo ifu ya kawunga, umuceri, isukari, amavuta n’amasabune yo gukaraba  mu  rwego rwo kubunganira mu  buzima bwabo  bwa buri munsi.

Umutoniwase yabwiye Umuseke ko iyi nkunga mu by’ukuri atari iyo gufasha  mu buryo bw’ubukungu ahubwo ngo ni uburyo bwo kubereka ko bari kumwe mu mutima, babazirikana kandi ko bazagaruka kuko ngo imvura igwa ari isubira.

Muri uyu mudugudu harimo imiryango icyenda y’abamugariye ku rugamba. Gashumba yabwiye Umuseke ko bavuzwa na MMI ndetse ngo hari amafaranga bahabwa buri kwezi abafasha kwikenura uko bishoboka. Umudugugu babamo wubatswe na Komisiyo y’igihugu yo gusubiza ingabo mu buzima busanzwe.

Uyu mudugudu ugaragara nk’aho wubatswe vuba urimo amashanyarazi ndetse n’amazi ari hafi kuzanwamo. Ubu ngo bari gukora ibishoboka ngo aya  mazi aze vuba kandi bashyiremo imihanda  igaragara.

Jean Pierre NIZEYIMANA
UM– USEKE.RW