‘Inkombo Dance Style’ imbyino nshya ya Jules Sentore

Ku nshuro ya kabiri yitabira irushanwa rya Primus Guma Guma Super Star, Jules Sentore umwe mu bahanzi bari muri iryo rushanwa yazanye imbyino nshya yise ‘Inkombo Dance Style’ avanga n’umuhamirizo asanzwe amenyereweho.

Mu gitaramo cya mbere cya full live giheruka kubera i Ngoma ho mu Ntara y’Iburasirazuba, nibwo Jules yagaragaje iyo mbyino atari asanzwe akoresha mu bindi bitaramo byabanjije.

Ku ruhande rwe anavuga ko intego afite ari ugukomeza gukora ibintu byose bijyanye n’umuco w’abanyarwanda aho kuba yakwibanda ku mbyino z’inyamahanga kandi atazapfa azibyinnye nka banyirazo.

Mu kiganiro yagiranye na Umuseke, Jules Sentore yakomeje avuga ko iyo style nshya arimo gukoresha muri iyi minsi ari imwe mu mbyino abanyarwanda bazishimira kuko ibibutsa ibihe bya kera.

Yagize ati “Iyo umuntu yitwa umuhanzi aba ari umuhanzi nyine. Ntabwo aba agomba kuririmba ibyo abandi baririmbye cyangwa se ngo abyine ibyo abandi basanzwe babyina.

Birashoboka ko waririmba wigana undi ariko icyo gihe uba ushaka kugira icyo wongera kuri ya ndirimbo cyangwa ya mbyino wiganye.

Impamvu rero ndimo gukoresha iyi style nshya yo kubyina, ni imbyino zakoreshwaga kera n’abanyarwanda bo hambere mpamya ko izashimisha benshi bo muri icyo gihe”.

Abajijwe uko abona irushanwa arimo uburyo rihagaze, Jules Sentore yavuze ko nta gihunga atewe n’umuhanzi uwo ariwe wese kuko yizeye icyo abagize akana nkemurampaka bazatangaza ku munsi wa nyuma w’irushanwa.

Joel Rutaganda

UM– USEKE.RW