Tom Close yakoranye indirimbo nshya na Eddy Kenzo

Muyombo Thomas umwe mu bahanzi bagize uruhare runini mu iterambere rya muzika nyarwanda uzwi nka Tom Close, yakoranye indirimbo n’umuhanzi Eddy Kenzo wo muri Uganda ukunzwe cyane mu Karere ndetse no muri Afurika.

Edrisa Musuuza wamenyekanye cya ku izina rya Eddy Kenzo, ni umuhanzi umaze kugira izina rikomeye cyane mu Karere k’Afurika y’Iburasirazuba no muri Afurika.

Mu mwaka wa 2008 nibwo uyu muhanzi yatangiye muzika ahereye ku ndirimbo yise ‘Yanimba’. Nyuma y’imyaka ibiri gusa atangiye kuririmba, muri 2010 yahise akora indi ndirimbo ayita ‘Stamina’ ari nayo ndirimbo yatumye amenyekana cyane.

Kuri ubu uyu muhanzi uherutse kwegukana kimwe mu bihembo bikomeye cya ‘Channel O Video Music Awards’, yakoranye indirimbo na Tom Close bise ‘Zero Distance’.

Iyo ndirimbo yakorewe muri studio ya Kina Music iyoborwa na Ishimwe Clement ari nayo ifitanye amasezerano na Tom Close ku bufatanye bw’ibikorwa bijyanye na muzika, ngo biteguye ko iyo ndirimbo izagera kure bitewe n’uburyo ikozemo.

Tom Close ni umwe mu bahanzi nyarwanda bakoranye n’umuhanzi w’umunyamerika witwa Sean Kingstone indirimbo bayita ‘Good times’.

Umva indirimbo nshya ya Tom Close yakoranye na Eddy Kenzo bise ‘Zero distance‘.

[youtube url=”https://www.youtube.com/watch?v=KwskK95XGjc” width=”560″ height=”315″]

Joel Rutaganda

UM– USEKE.RW