Grace arasaba gushyigikirwa muri Miss Africa USA

Grace Bizuru umunyarwandakazi ubarizwa muri Leta Zunze Ubumwe z’Amerika, arasaba abanyarwanda kuzamwereka urukundo bamushyigikira mu irushanwa ryitwa ‘Miss Africa USA’ rimwe mu marushanwa aha amahirwe abakobwa bakomoka muri Africa kuba bajya banitabira amarushanwa akomeye ku isi.

Bizuru utuye mu Mujyi wa Silver Spring muri Leta ya Maryland, ari mu bakobwa 20 bahatanira ikamba rya Miss Africa USA rihatanirwa n’abakobwa bakomoka muri Afurika ariko baba muri Leta Zunze Ubumwe za Amerika.

Ku wa 10 Kamena 2015 nibwo hazatangizwa gutorwa ku mugaragaro hakoreshejwe uburyo bwa internet. Naho tariki ya 29 Kanama 2015 akaba aribwo hazatangwa ikamba ku mukobwa wahize abandi ugomba guhagararira umugabane wa Afurika mu buranga.

Iri rushanwa rigiye kuba ku nshuro ya 10 dore ko ryatangijwe muri 2005, Mu mwaka wa  2014 ryitabiriwe n’umunyarwandakazi witwa ‘Adeliné Umubyeyi’. riza kwegukanwa na ‘Meron Wudneh’ wo muri Ethiopia.

Grace Bizuru uvuga ko asanzwe afite gahunda yo gukorera umushinga mu Rwanda wo guteza imbere abari n’abategarugori, ngo byaba ari amahirwe akomeye agize mu gihe cyose yaba yegukanye iryo kamba.

Kuko uretse kuba yakora ibyo bikorwa bifasha, avuga ko n’u Rwanda muri rusange rwaba rubonye umuntu ushobora kugira icyo yunganira abanyarwanda babarizwa muri Amerika.

Joel Rutaganda

UM– USEKE.RW