Nizzo (Urban Boys) ngo ashobora kwirukanisha Piano muri Super Level

Nshimiyimana Muhamed (Nizzo) ni umwe mu bahanzi babarizwa mu itsinda rya Urban Boys kimwe na bagenzi be aribo Safi na Humble. Ngo mu gihe Piano ataretse ibyo gushaka gusenya ‘AllStar Music’ azirukanwa muri The Super Level imwe muri studio ikorerwamo n’abo bahanzi.

Mu gihe gishize Piano (Olivier Sheja) utunganya amajwi, Nizzo (Nshimiyimana Muhamed) usanzwe aririmba muri Urban Boys n’uwitwa Gilbert utunganya amashusho. Bishyize hamwe bashinga icyo bise ‘All Stars Music’ bagamije kujya bazamura abahanzi bakiri bato bakabafasha kumenyakanisha ibihangano byabo nabo bakabonamo inyungu.

Nyuma haza kuvugwa ukutumvikana hagati ya Piano na Nizzo bapfa umuhanzi Aime Bluestone urimo gushaka gusinyishwa na Piano amuvana muri label yitwa ‘All star Music’ yabarizwagamo.

Imwe mu mishanga Piano afite yo kuba ashaka gushing label ye, ngo niyo ntandaro yo kutumvikana na Nizzo bapfa ko ashaka kujyana bamwe mu bahanzi bari bafite gahunda imwe yo kubamenyekanisha.

Mu kiganiro na Sunday Night, Nizzo yatangaje ko adashobora kwihanganira gukomeza gukorana na Piana muri Super Level ahubwo ko agiye kumwirukana.

Yagize ati “Ntabwo nshobora gukomeza gukorana na Piano muri Super Level, kuko si umuntu nakwita inshuti yanjye cyangwa twakomeza gukorana. Ikizima ni uko mwirukana”.

Akimara gutangaza ko agiye kwirukana Piano muri Super Level, Piano nawe yavuze ko nta kintu na kimwe yavugana na Nizzo kuko atariwe bagiranye amasezerano y’imikoranire.

Ati “Nizzo se anyirukana yampaye akazi?akazi nagahawe na Super Level kandi ntabwo ibarizwamo Nizzo gusa. Ubwo bose nibahamya ko njyenda nzagenda kuko akaboko kanjye ntabwo bazaba bagasigaranye”.

Amwe mu makuru agera ku Umuseke, ni uko mu minsi ya vuba Piano ashobora gushing inzu ye itunganya muzika azita “Groove Music Group” ku bufatanye na K8 Kavuyo ubarizwa muri Amerika.

Joel Rutaganda

UM– USEKE.RW