Burundi: Abanyapolitiki ntibemeranywa ku ngengabihe nshya y’amatora

Mu mpera z’icyumweru gishize, Minisitiri w’umutekano mu Burundi Gabriel Nizigama yasabye Komisiyo y’amatora ko igomba gukora  ibishoboka byose igategura ingengabihe y’amatora nshya kugira ngo azakorwa ave mu nzira ubuzima bw’igihugu bukomeze. Gusa impande zihanganye ntizivuga rumwe ku ngengabihe yakorwa n’igihe amatora yabera.

Nizigama yasabye kandi abanyapolitiki gusubira mu biganiro kugira ngo bemeranywe ku cyakorwa ngo amatora azabe mu mahoro.

Inama y’umutekano ishamikiye kuri Minisiteri y’umutekano ishyigikiye ishyaka riri ku butegetsi, CNN-FDD, iri naryo rikaba rishinja abatavuga rumwe naryo ko batinza amatora nkana.

Ishyaka Sahwanya- Frodebu rya Leonce Ngendakumana rishaka ko ingengabihe nshya y’amatora izemerwa ari uko yemeranyijweho n’amashyaka yose ndetse n’izindi nzego zirebwa n’ibibazo bya politiki biri mu Burundi.

Umuvugizi wa Komisiyo y’amatora Prosper Ntahorwamiye, yemeza ko bishoboka ko iyi Komisiyo ariyo yazatanga ingengabihe y’amatora ariko akemeza ko hari izindi ngingo zihariye bizaba ngombwa ko baganiraho n’abo bireba.

Muri izo ngingo harimo gucyura impunzi, gufungura za radio  zigenga zafunzwe, guhagarika imyigaragambyo ndetse no guhagarika amarondo.

Umunyapolitiki utavuga rumwe na Leta Agathon Rwasa we asanga ikibazo cyo gushyiraho ingengabihe nshya y’amatora kizaba  ingorabahizi, kuri  we no gushyiraho inzibacyuho  binyuranyije n’Itege Nshinga  nk’uko ngo kwiyamamaza kwa Nkurunziza nabwo ngo Itegeko Nshinga ritabyemera.

Umuhuza mu bibazo by’i Burundi Saïd Djinitt  ntavugwaho rumwe n’abari mu biganiro kuko uruhande rw’abatavuga rumwe na Leta rumushinja kubogamira kuri Leta ndetse hakaba hari n’abatangiye gusaba ko yasimbuzwa undi.

Inama nkuru y’umutekano mu Burundi, CNS, kuri iki cyumweru yasabye abaturage gutanga amafaranga ku bushake kugira ngo akusanywe azafashe mu gutegura no gukoresha mu matora kuko ayo bari bategereje ku baterankunga yahagaritswe.

UM– USEKE.RW