The Ben agiye kongera kumvikana mu njyana ya R&B

Mugisha Gisa Benjamin (The Ben) umuhanzi wamenyekanye cyane mu njyana ya RnB nyuma akaza gusa naho ayireka akumvikana mu zindi zibyinitse, ubu noneho The Ben ngo arashaka gukora injyana imwe gusa ariyo R&B nta zindi avanzemo.

The Ben ubarizwa  muri Leta Zunze Ubumwe z’Amerika mu mujyi wa Chicago, Illinois, ni umwe mu bahanzi nyarwanda bazi kuririmba by’umwimerere ‘Live’, mu muryango wabo afite abavandimwe na bo bafite impano yo kuririmba aribo, Green P ndetse na Dan Scotty.

The Ben yaba agiye kongera gusubira mu njyana zituje mu buryo bwo kongera gukumbuza abakunzi be izo njyana yanamenyekaniyeho.

Ubusanzwe ngo uyu muhanzi yakundishijwe kuririmba n’umuryango we aho yakuze akundishwa n’ababyeyi be gusenga cyane. Byatumye ajya muri Korali aho yari ari kumwe n’abandi bahanzi bamenyekanye nka Meddy, Lick Lick, Nicolas n’abandi.

‘Amaso ku Maso’ niyo ndirimbo yamenyekaniyeho mu mwaka wa 2008, nyuma y’izindi nyinshi yararirimbyemo aho yabaga ari kumwe na Tom Close nka ‘Si beza’ na ‘Mbwira’.

Nyuma yaje gukora indirimbo nka ‘Uzaba Uza’ yaririmbanye n’undi muhanzi witwa Roger. Aza gukora izindi zirimo, Wirira, Imfubyi, Wigenda, Uri he, Sinzibagirwa, Amaso ku Maso, Amahirwe ya Nyuma, Zoubeda n’izindi.

Zimwe muri izo ndirimbo yaje kuzishyira kuri album ye ya mbere yamurikiye muri petit stade yitwaga ‘Amahirwe ya nyuma’.

Kuri ubu The Ben nkuko abitangaza avuga ko indirimbo arimo gukora izajya hanze mu minsi mike yise ‘Sinahindutse’, izatuma abanyarwanda bongera kumva umwimerere w’ijwi ry’uyu muhanzi.

Reba amashusho y’indirimbo The Ben yahereyeho yise ‘Amaso ku maso’

[youtube url=”https://www.youtube.com/watch?v=EINHUFv5J8s” width=”560″ height=”315″]

Joel Rutaganda

UM– USEKE.RW