Kenya yasabye UN gucyura Abanyasomalia nyuma y’ibitero bya Garissa

Kenya yemeza ko yasabye Umuryango w’abibumbye gucyura abaturage bakomoka muri Somalia babayo bitarenze muri Nyakanga uyu mwaka kubera kubakekaho guha umusanzu ibyihebe bya Al Shabab byagabye ibitero kuri Kaminuza ya Garissa

Itangazo rya Leta rivuga ko Vice President wa Kenya William Ruto yemeza ko igihugu cye cyasabye UN kuba yacyuye Abanyasomalia bitarenze amezi atatu ari imbere.

UNHCR kuri iki cyumweru yemera ko itarabona urwandiko rwa Kenya ariko ikongeraho ko idashobora guhatira impunzi gutaha ku ngufu.

Umuvugizi wa UNHCR Emmanuel Nyabera yabwiye AFP ati: “ Kugeza ubu ntiturabona inyandiko iyo ariyo yose ya Kenya idusaba gucyura Abanyasomaliya.”

Yongeyeho ko Kenya ifite inshingano mpuzamahanga zo kurengera impunzi kandi ntizirukane ku gahato.
Abarwanyi ba Al Shabab biyemereye ko aribo bishe abanyeshuri n’abakozi bo muri Kaminuza ya Garissa ku italiki ya 2, Mata uyu mwaka.

Garissa iherereye mu bilomerero ijana uvuye ku nkambi y’impunzi ya Dadaad ibamo Abanyasomaliya benshi kandi ituranye n’umupaka ugabanya Kenya na Somalia.

Kenya ifite inkambi ya mbere nini ku Isi ya Dadaab irimo impunzi zo muri Somalia zingana na 450 000.

Muri 2013, ubwo ibyehebe bya Al Shabab byateraga kuri Westgate, Kenya yashatse gufunga inkambi ya Dadaab ariko amahanga ayibera ibamba.

Ubwo Al Shabab yagabaga igitero muri Westgate, icyo gihe ibyehebe byahitanye abagera ku 68.

Kuwa gatatu w’icyumweru gishize, ubutegetsi bwa Kenya bwafunze ibigo by’imari 14 byoherereza abantu amafaranga nyuma y’amakuru y’uko inzego z’ubutasi zimenye ko biriya bigo byohererezaga Al Shabab amafaranga ayifasha kwisuganya mu bitero byayo.

Ubu Abanyakenya batanu n’Umunyatanzaniya umwe barafunze bakekwaho uruhare mu bitero byo kuri Garissa.

Abaturage ba Kenya banenze uburyo ubuyobozi bwabo bwitwaye nyuma y’ibitero byo kuri Garissa, bavuga ko bigaragaraza ko babigenzemo  biguru ntege.

The Daily Monitor

UM– USEKE.RW