Muhanga:Akarere karemera kwishyura miliyoni 5, umuturage agasaba 16

Iki cyemezo cyo guha Ndamage Slyvain, indishyi z’akababaro zingana na miliyoni eshanu zirenga zijyanye n’ibyo yangirijwe yubaka, kije nyuma y’uko Akarere ka Muhanga kemeye ku mugaragaro ko kasenyeye uyu muturage kandi ariko kamwihereye kandi kakamuha ibyangombwa byo kubaka mu buryo bw’igihe kirekire. Ariko Ndamage we arasaba ko bamuha miliyoni 16 bityo agakomeza ibikorwa bye bikarangira neza.

Hashize amazi hafi atanu, Umuyobozi w’akarere ka Muhanga, Mutakwasuku Yvonne asabye abakozi bo mu karere ka Muhanga n’Umurenge wa Nyamabuye ko basenyera Ndamage Slyvain kubera ko ngo yahawe ibyangombwa byo kubaka binyuranyije n’imiterere y’igishushanyo mbonera cy’akarere.

Mayor Mutakwasuku yemezaga ko aho hantu Ndamage yubatse hari hagenewe inyubako z’amagorofa. Ndamage yarasenyewe kandi yari afite ibyangombwa ubuyobozi bw’ Akarere bwamuhaye.

Ndamage abonye ko arenganyijwe, yandikiye Umuvunyi mukuru amusaba kurenganurwa, Umuvunyi asaba ubuyobozi bw’Akarere kwishyura Ndamage ibikorwa bye byose bwasenye ariko butinda kubishyira mu bikorwa.

Nyuma nibwo Akarere kohereje umugenagaciro wako, abara ibikoresho byasenywe abiha agaciro ka miliyoni eshanu z’amafaranga y’u Rwanda, Ndamage amenye ko ari ko gaciro bageneye ibikorwa bye ntiyabyemera.

Ndamage yashatse undi mugenagaciro amubarira ko ibyo akarere kasenye bifite agaciro ka Miliyoni 16 z’amafaranga y’u Rwanda, iyo raporo ayoherereza akarere kugira ngo kamwishyre bityo akomeze imirimo ye yo kubaka.

Mu kiganiro Ubuyobozi bw’akarere ka Muhanga, bwahaye abanyamakuru, Mutakwasuku Yvonne yemeye ko akarere kakoze amakosa yo gusenyera Ndamage ariko ko kemeye kumuha indishyi z’ibyo kasenye zingana na miliyoni 5 zirenga make.

Yavuze ndetse ko abashinzwe ubutaka mu karere aribo bakoze amakosa akomeye yo kumuha icyangombwa kitubahirije igishushanyo mbonera kuko ngo iki gishushanyombonera kigaragaza ko hazubakwa inyubako z’amagorofa.

Uyu muyobozi avuga ko kuba Ndamage atemera guhabwa miliyoni 5 agasaba miliyoni 16 hazarebwa undi mugenagaciro impande zombi zumvikanyeho kugirango ari we ubakiranura.

Mu ibaruwa ebyeri Umuyobozi w’akarere yandikiye abakozi babiri bashinzwe ubutaka, yabasabye gusobanura impamvu bahaye Ndamage kiriya cya ngombwa cyo kubaka, kandi aho hantu haragenewe inyubako z’amagorofa.

Ngo bamusubije ko aho uyu muturage yasabye kubaka, mu gishushanyo mbonera hatagaragara ikintu na kimwe kigomba kuhubakwa, ko ibyo Umuyobozi w’akarere avuga nta shingiro bifite ko ahubwo yahohoteye umuturage.

Mu kiganiro Umuseke wagiranye na Ndamage, avuga ko kuba Umuyobozi w’akarere yemera kumuha miliyoni 5 zirenga bidaterwa n’impuhwe amufitiye kuko iyo ajya kubaka hadakurikije amategeko atari guhabwa aya mafaranga, asaba inzego zishinzwe kurwanya akarengane ko zamufasha agahabwa aya mafaranga asaba.

Yagize ati:« Uwo narikuregera niwe urimo kundenganya, mpeze mu gihirahiro, sinzi ikintu ngomba gukora, nibereye mu matongo»

Abakozi batandukanye b’Akarere ka Muhanga bavuga ko kugeza ubu batazi aho Umuyobozi w’akarere azavana amafaranga yo kwishyura Ndamage, kubera ko amabwiriza bagenderaho asaba ko uwagize uruhare mu gusenyera umuturage mu buryo bunyuranyije n’amategeko ari we ugomba kwirengera ingaruka zose zibyangiritse.

Umunyamategeko wavuganye na Umuseke yatubwiye ko ubusanzwe iyo ikemezo cyafashwe n’umuntu ku giti cye atabigishije inama nyobozi na njyanama, ikemezo afashe kigashyira umuturage mu gihombo kandi nta mategeko yishe, uwafashe icyo kemezo ngo niwe wirengera ingaruka zose zatewe n’icyo gihombo.

MUHIZI ELISEE

UM– USEKE.RW-Muhanga.