Biyemeje gukora Holocaust y’Ikoranabuhanga kuri Israel muri uku kwezi

Itsinda ry’aba ‘hackers’(abahanga kabuhariwe mu gukoresha mudasobwa) ryitwa Anonymous ryiyemeje ko bagiye guhuriza hamwe ubuhanga bwabo bakangiza websites zikomeye za Isrel kuri uyu wa Kabiri taliki ya 07, Mata, 2015.

Nk’uko bitangazwa na Jerusalem Post, aba hackers ngo bazakora ibi mu rwego rwo guhorera Abanyapalestina baguye mu bitero Israel yagabye muri Gaza umwaka ushize mu kiswe The Operation Protective Edge, Israel ivuga ko cyari kigamije gusenya imyobo yari yaracukuwe na Hamas yatumaga ibasha kurasa muri Israel.

Aba bantu bagize Anonymous bavuga ko ibikorwa byo kwangiza za Websites za Israel bakise ‘The electronic Holocaust’.

Umwaka ushize Ikigo cy’ubutasi bw’imbere mu gihugu cya Israel cyitwa Shin Bet cyatangaje ko cyashyizeho itsinda ryihariye ry’abahanga muri mudasobwa rishinzwe kumenya hakiri kare aba hackers bashobora kwingiza Israel ariko ngo baje gusanga hari websites zamaze kwangizwa nabo mu rugero runaka.

Muri zo harimo website ya Minisiteri y’intebe yitwa Yad Vashem ndetse n’iya Minisiteri y’ingabo.

N’ubwo aba hackers b’Abasilamu bagize Anonymous bafatanyije n’abandi bo ku Isi biyemeje kwangiza za website za Israel, umwaka ushize aba hackers b’Abayahudi bashoboye kwinjira muri mudasobwa za bamwe mu bagize Anonymous banyuze muri camera za mudasobwa zabo babasha kubona amasura yabo, bahita bayashyira hanze.

Munsi y’amafoto yabo banditseho ngo: “ Israel yabayeho muri 1312 mbere ya Yesu kera cyane Islam itarabaho, mwe muracyari abana.”

Ubusanzwe Holocaust ni ijambo bise Jenoside yakorewe Abayahudi aho baribari  hose mu Burayi guhera muri 1935 kugeza 1945 yakozwe n’ubutegetsi bw’Abanazi bari bayobowe na Adolf Hitler.

UM– USEKE.RW