Ubwongereza: Hafashwe Drone yari ijyanye ibiyobyabwenge muri Gereza

Indege nto cyane  iyoborwa na za mudasobwa bita drone yagaragaye ijyanye ibiyobyabwenge muri gereza irinzwe cyane mu Bwongereza yitwa Bedford Prison.

Ikinyamakuru Mailonline cyanditse ko ari ubwa mbere mu mateka y’Ubwongereza babona drone ikoreshwa mu  bikorwa nk’ibi  bitemewe n’amategeko.

Iyi ndege yakorewe mu Bushinwa  ngo yari ipakiye kandi intwaro, telefone zigendanwa zigezweho n’ibyuma.

Abarinzi ba gereza babashije kuyibona bakoresheje intsinga bashyize muri mudasobwa ifite  imirasire yitwa razor .

Hari abavuga ko abohereje iriya  ndege bari bapanze ko nigera aho bari bayiteguriye yari buhagarare hejuru bakayotegeka kurekura ibyo yari izanye bikagwa hanze hafi y’idirishya hanyuma umwe mu bagororwa akareba uburyo atora ‘imari’ ye.

Ubu Police y’Ubwongereza ifite impungenge iterwa n’ubwinshi bwa biriya bikoresho kandi ngo irimo irasaba uburenganzira bwo kuzajya ihagarika biriya bikoresho igihe cyose bizaba byakoreshejwe mu buryo bunyuranyije n’amategeko.

Iriya drone yafashwe mu byumweri bibiri byashize ariko bitinda gushyirwa ku mugaragaro kubera inyungu z’umutekano. Igura amafaranga £ 900 kandi wayigurira kuri internet.

Ifite camera ishobora kureba impande zose, yihindukiza. Bayifashe sa tanu n’igice z’ijoro.

Umuvugizi wa Police muri Bedford avuga ko ubu bari gusuzuma iriya ndege ndetse n’ibyo yari ipakiye.

Gereza ya Bedford  ifite ubushobozi bwo gucumbikia abagororwa 500.

UM– USEKE.RW