Gabiro: Abayobozi ba Kaminuza n’amashuri makuru biyemeje kuzamura ireme ry’uburezi

Hasozwa itorero ry’abayobozi ba kaminuza n’amashuri makuru i Gabiro mu karere ka Gatsibo, kuri uyu wa 14 Werurwe 2015 abitabiriye itorero bavuze ko kugirango ngo ireme ry’uburezi rigikemangwa mu Rwanda rizamuke, bagomba gushyira imbaraga gukora ubushakashatsi kandi uburezi bugashingira ku ndangagaciro.

Imwe mu mihigo bahize harimo kuzamura ireme ry’uburezi, gushyiraho ingamba na gahunda z’iterambere mu Rwanda, guteza imbere indangagaciro nyarwanda no kuzamura isura y’igihugu, gushyira imbaraga mu bushakashatsi no gukorera hamwe, gushishikariza abanyeshuri gusobanurirana hagati yabo, abarimu bagakorana mu gihe bigisha kugira ngo bagirane inama  n’ibindi.

Minisitiri w’Uburezi  Prof Silas Lwakabamba yavuze ko itorero nk’iri ari ingirakamaro cyane kuko rituma abantu bigirira ikizere bigatuma bahindura byinshi mu mikorere yabo.

Minisitiri Lwakabamba yagize ati: “Itorero rituma bigirira icyizere kuko hari ibigo by’amashuri byavugaga ko hari ibintu bitakora ariko mwiboneye ko bashobora guhindura byinshi biturutse mu kwigirira ikizere.”

Prof. Lwakabamba yongeyeho ko igihe ushaka gukora neza, ugomba gukorana na bagenzi bawe kuko abantu bagira ubumenyi butandukanye n’uburyo butangwamo bugatandukana.

Yavuze kandi  abayobozi bafite ibisubizo by’ibibazo mu ntoki zabo kuko nta ngengo y’imari bisaba.

Yabasabye ko ubushakashatsi bakora bwiyongera kandi bugakoreshwa  mu buryo bwinshi, bakarushaho no kwitabira gahunda za Leta ziteza imbere abaturage zirimo kugira uruhare mu biganiro binyura kuri radiyo zitandukanye no kujya mu muganda rusange ubu buri kwezi.

Kuri we ngo uruhare rwa Leta  rurimo kongerera ubushobozi abarimu bagakomeza kwiga.

Hasobanuwe ko abarimu bafite impamyabumenyi y’ikirenga ku rwego rwa Doctorat ari 17%  bityo ko uyu mubare ugomba kwiyongera  nibura ukagera kuri 50% kandi bakarushaho gukorana  na za kaminuza zo hanze  mu rwego rw’ubufatanye.

Aba bayobozi bamaze iminsi umunani mu itorero mu rwego rwo gutozwa indagagaciro na kirazira, kubahuriza hamwe kugira ngo bungurane ibitekerezo by’uko ireme ry’uburezi ryazamuka.

Abo UM– USEKE waganiriye nabo bameza ko itorero hari icyo ribafashije mu kazi kabo kandi ko rizatuma imyigishirize ihinduka.

Prof. Issaie Nzeyimana wigisha muri Kaminuza y’u Rwanda, Ishami rya Huye yavuze ko itorero ribafasha gushyira imbaraga ku ndangagaciro ziranga u Rwanda kuko aribyo biranga umunyarwanda.

Yongeyeho ko izi ndangagaciro zizifashishwa mu kuzamura ireme ry’uburezi  hifashishijwe gukora ubushashakashatsi bwimbitse

Ati:  “Iyo ufite indangagaciro wigirira ikizere bityo ibyo ukora ukabikora neza.”

Iri torero ryatangiye tariki ya 07 kugeza kuwa 14  Werurwe uyu mwaka, ryitabiriwe n’abayobozi 206 bo muri kaminuza n’amashuri makuru yaba aya Leta n’ayigenga.

Byavuzwe ko mu gihe kizaza kubera umusaruro ritanga bishoboka ko hakongerwa iminsi rimara byubura ikaba nk’ibyumweru bibiri kandi nibura rikaba kabiri mu mwaka.

Théodomir NTEZIRIZAZA

UM– USEKE.RW