“Inshuro 5 twitabira PGGSS ni uko tudashoboye?” – Dream Boys

Kuva mu mwaka wa 2011 ubwo irushanwa rya Primus Guma Guma Super Star ryatangiraga mu Rwanda, Nta na rimwe itsinda rya Dream Boys ryari ryabura mu bahanzi 10 bitabira iryo rushanwa. Kugeza ubu baribaza niba impamvu batari begukana iryo rushanwa ari uko badashoboye.

Nemeye Platini na Mujyanama Claude uzwi cyane muri muzika nka TMC, nibo basore bagize itsinda rya Dream Boys. Ni rimwe mu matsinda akomeye mu Rwanda nyuma yuko rimenyekaniye cyane muri muzika mu mwaka wa 2009.

Kuba bataregukana iryo rushanwa n’inshuro imwe mu nshuro enye bamaze kuryitabira ndetse no ku nshuro ya gatanu bakaba bazaryitabira, ngo ntibazi igisabwa ngo baryegukane.

Ubwo hatangazwaga abahanzi 10 bazitabira Primus Guma Guma Super Star5, Nemeye Platini wo muri Dream Boys yasabye ko bahabwa icyo gikombe irushanwa bakarisigira abahanzi bashya barimo kuryinjiramo.

Yagize ati “Iri rushanwa turyitabiriye inshuro zigera kuri eshanu, mwaduhaye amahirwe yo kuryegukana tugasigira aba barumuna bacu barimo kuzamuka umwanya”.

Nyuma y’iryo jambo imbere y’imbaga yari muri icyo gitaramo ndetse n’abari bashinzwe akana nkemurampaka (Judges), Dream Boys yatangarije Umuseke ko gahunda bafite ari ukwegukana iri rushanwa.

Bagize bati “Kuba tumaze kwitabira irushanwa rya Primus Guma Guma Super Star inshuro zose eshanu rimaze kuba, twibaza ko ari uko ibikorwa byacu dukorera abanyarwanda bigaragara kandi bibashimisha.

Ikibazo umuntu wese ashobora kwibaza, kuki tutegukana iryo rushanwa kandi mu nshuro zose tumaze kujyamo tutarabura mu bahanzi batatu baba bagomba kuvamo umwe wegukanye irushanwa?

Niba hararebwaga amazina akomeye cyangwa ibikorwa ndetse no kugaragaza ko umuntu akunzwe, iyi nshuro mu bahanzi turi kumwe mu irushanwa nta n’umwe watuza imbere. Igihe kirageze rero ngo na Dream Boys ngo twegukane irushanwa rya Primus Guma Guma Super Star”.

Mu gihe iri tsinda rigaragara mu bahanzi bazitabira irushanwa rya Primus Guma Guma Super Star5, ngo n’imyiteguro yo gushyira hanze album yabo ya gatanu bise “NZIBUKA N’ABANDI” igeze kure.

Biteganyijwe ko icyo gitaramo kizaba ku itariki ya 29 Werurwe 2015 muri Kigali Serena Hotel. Agashya muri icyo gitaramo ni uko Knwoless na Christopher aribo bazaba ari abashyushya rugamba (MCs) bafatanyije na Arthur ndetse na Tidjala Kabendera.

Abahanzi nka Tom Close na Jay Polly bari mu bazaza gufasha Dream Boys gususurutsa abantu. Kwinjira muri icyo gitaramo ni 5000 frw na 10.000 frw mu myanya y’icyubahiro VIP.

Umva indirimbo nshya bise “Naguye ahashashe”

Rutaganda Joel

UM– USEKE.RW