PGGSS5: Harabura iminsi 2 ngo hamenyekane abahanzi 10 bazitabira irushanwa

Mu masaha agera kuri 48 gusa, haraba hamenyekanye abahanzi 10 bagomba kwitabira irushanwa rya Primus Guma Guma Super Star5 mu gitaramo giteganyijwe kuba ku wa gatandatu tariki ya 07 Werurwe 2015 ahasanzwe habera Expo i Gikondo.

Ni nyuma y’aho hatangarijwe amazina y’abahanzi 16 bose bazahatanira gutambuka mu 10. Muri ayo mazina hakaba haragaragayemo abahanzi 10 b’abagabo ndetse na batanu b’abakobwa.

Abahanzi 10 batoranyijwe mu bagabo ni, Active, Bruce Melody, Bull Dogg, Danny Nanone, Dream Boys, Senderi International Hit, Jules Sentore, Social Mula
Naason Nshimiyimana, Rafiki na TNP.

Mu bahanzi b’abakobwa bahawe amahirwe yo kuba hagira abavamo bazitabira irushanwa rya Primus Guma Guma Super Star5 ni, Jody Phidi, Knowless, Queen Cha, Young Grace na Oda Pacy.

Bimwe mu byagendeweho mu gutoranya abo bahanzi, hagendewe ku bikorwa bakoze, kuba nibura hagati ya 2011 na 2013 umuhanzi yarakoze indirimbo eshanu mu majwi no mu mashusho, no kuba mu mwaka wa 2014 yarakoze indirimbo nibura imwe mu majwi no mu mashusho, ibihangano bigakundwa.

Mushyoma Joseph umuyobozi wa East African Promotors usanzwe ategura iri rushanwa ku bufatanye na Bralirwa, yatangarije Umuseke ko kugeza ubu nta kibazo na kimwe gihari cyatuma habaho isubikwa ry’icyo gitaramo.

Yagize ati “Imitegurire y’igitaramo igeze kure ndetse n’abahanzi ubwabo nta n’umwe ufite ikibazo kizatuma atagaragara kuri stage.

Kuri uyu wa kane nibwo batangira kwitoreza kuri stage bazaririmbiraho ku wa gatandatu mu buryo bwo kurushaho kuyimenyera no kuba banareba ibice byayo byatuma abazitabira icyo gitaramo bababona ndetse bakanumva ibyo baririmba neza”.

Joel Rutaganda

UM– USEKE.RW