Urban Boys ngo ntabwo iri ku rwego rw’abahanzi bashaka izina mu Rwanda

Itsinda rya Urban Boys ribarizwamo abasore batatu aribo, Safi Niyibikora, Nizzo Muhamed na Manzi James uzwi nka Humble, ngo ntabwo bakiri abahanzi bo kuba bagishakira izina muri muzika nyarwanda, ahubwo barareba hakurya y’umupaka w’u Rwanda.

Ni nyuma y’aho iri tsinda risezereye ku mugaragaro irushanwa risanzwe rihuza abahanzi bakomeye mu Rwanda rya Primus Guma Guma Super Star rigiye kuba ku nshuro ya gatanu.

Mu kiganiro Humble Jizzo yagiranye na Umuseke, yavuze ko urwego bagezeho nk’itsinda rya Urban Boys atari ukwirirwa mu bikorwa bidafite icyo bibinjiriza ngo barashaka kwimenyekanisha. Ahubwo gahunda bafite ni ukureba hanze y’u Rwanda.

Ati “Ntabwo Urban Boys ikiri ku rwego rwo kuba dushaka kwimenyekanisha mu Rwanda. Ahubwo urwego tugezeho ni ugushaka uburyo twageza kure muzika nyarwanda.

Kuko mu gihe tutaba twafata imyanzuro ku giti cyacu yo kuba hari ibikorwa twakwigomwa bidafite icyo bitwongerera, ntaho twazapfa tugeze ugereranyije n’ingamba dufite zo kuba hari aho twageza muzika nyarwanda”.

Akomeza avuga ko mu mishanga bafite mu minsi iri imbere, ari iserukiramuco bagomba kwitabira rizabera mu gihugu cya Nigeria ndetse no kuba bashaka abahanzi bakomeye ku rwego rw’isi bakorana imishinga itandukanye irimo no gukorana indirimbo.

Ku ikubitiro Urban Boys igiye gukorana indirimbo n’umuhanzi wo mu gihugu cya Kenya uherutse kwitabira igitaramo cyo gutoranya Nyampinga na Rudasumbwa bo muri Mount Kenya Universty witwa Jaguar.

Joel Rutaganda

UM– USEKE.RW