Umutoza Kayiranga arishyuza ikipe ya Mukura miliyoni 13

Umutoza Kayiranga Baptiste  arishyuza ikipe ya Mukura Victory sport  miliyoni 13 z’amafaranga y’u Rwanda nyuma yo kumwirukana mu ntangiriro z’uyu mwaka wa shampiyona.

Amakuru agera ku Umuseke aremeza ko Kayiranga Baptiste  wirukanwe n’ikipe ya Mukura yamaze kurega iyi kipe mu ishyirahamwe ry’umupira w’amaguru mu Rwanda (Ferwafa) avuga ko yamwirukanye ku buryo budakurikije amategeko.

Aya makuru akomeza avuga ko Kayiranga Baptiste yanatsinze ikipe ya Mukura VS bityo iyi kipe igategekwa na Ferwafa ku ishyura Kayiranga Miliyoni 13 z’amanyarwanda

Mu kiganiro n’umuvugizi wa Ferwafa,  Dr Hakizimana Mousa yemeje aya makuru avuga ko Kayiranga yaregeye ishyirahamwe ndetse ngo iki kibazo kiri muri Komisiyo ishinzwe imyitwarire muri FERWAFA.

Mousa yagize ati “Ayo makuru ni yo. Kayiranga yaturegeye ko yirukanwe binyuranyije n’amategeko, iki kibazo kiri muri komisiyo ishinzwe imyitwarirere.”

Si ubwa mbere iyi Kipe yo mu Ntara y’Amajyepfo mu karere ka Huye ivuzweho ibibazo byo kwambura abatoza, mu minsi yashize umutoza Ally Bizimungu yari yatangaje ko agiye kurega Mukura kubera umwenda yari imufitiye, aha Mukura binyuze mu muvugizi wayo yemeye ko Mukura ifitiye umwenda Ally Bizimungu.

Ikipe ya Mukura VS kuri ubu iri ku mwanya wa 11 wa shampiyona n’amanota 16 aho imaze imikino igera kuri itatu nta ntsinzi itaha i Huye.

NKURUNZIZA Jean Paul
UM– USEKE.RW