“Ibyo gusezera kwa Jay Polly muri Touch Records ntacyo mbiziho”- Alain

Rudahanwa Alain umujyanama (Manager) w’abahanzi babarizwa mu nzu itunganya muzika izwi nka Touch Records, aratangaza ko nta makuru afite ku isezera ry’umuraperi Jay Polly ubarizwa muri iyo label.

Ibi abitangaje nyuma y’aho hari amakuru yavugaga ko uwo muraperi umaze kugira izina rikomeye muri muzika nyarwanda ko yaba yamaze kwandika urupapuro (Lettle) isaba gusesa amasezerano bafitanye.

Muri Nzeri 2013 nibwo Jay Polly na Touch Records bagiranye amasezerano angana n’imyaka itatu. Gusa ngo muri ayo masezerano harimo ibyo bumvikanye bishobora kubarengera mu gihe haba hari ubona bitagenda neza akaba yayahindura.

Alain yatangarije Umuseke ko ayo makuru nawe yakomeje kugenda ayumva ariko atazi aho yaba ava. Kandi ngo niba koko aribyo ntacyo yabikoraho yamureka akagenda.

Yagize ati “Ayo makuru nabyutse nyumva ahantu henshi ndetse hari n’abanyamakuru bagiye bayambazaho. Ariko ukuri kwanjye mfite ni uko aribwo bwa mbere mbyumvise.

Gusa ku rundi ruhande nubwo ntabyo ubuyobozi bwa Touch Records bubiziho, niba koko hari uwo yaba yabibwiye ko afite iyo gahunda cyangwa yamaze kwandika urwo rupapuro ntabwo twamubuza kugenda.

Mu masezerano dufitanye harimo itegeko ryamurengera mu gihe yaba ashaka guhindura amasezerano igihe kitarangiye kimwe nkuko natwe harimo iriturengera”.

Nyuma yo kuvugana na Alain uyobora Touch Records, Jay Polly nawe avuga ko ntacyo abiziho ibyo bivugwa ariko mu gihe byaba aribyo ko byajya ahagaragara nta mpamvu yo kubihisha.

Touch Records ni imwe mu mazu atunganya muzika nyarwanda yagiye inyuramo abahanzi benshi barimo, Bull Dogg, Fireman, Gisa Cy’Inganzo, Ganza n’abandi.

Joel Rutaganda

UM– USEKE.RW