“Udatembera igihugu wakiririmba ute?”- Senderi

Eric Senderi ni umuhanzi  umaze igihe kirenga imyaka 19 muri muzika, azwi ku izina rya International Hit muri muzika nyarwanda ndetse no mu njyana ya Afrobeat. Avuga ko abahanzi impamvu bataririmba ku gihugu cyane ari uko abenshi ntacyo bazi.

Uyu muhanzi ubusanzwe uzwiho kugira udushya mu miririmbire ye kuri stage, atangaje ibi nyuma y’aho mu minsi ishije yagiye akorera ibitaramo mu Ntara zimwe na zimwe mu buryo bwo kurushaho kwegera abakunzi be batari mu Mujyi wa Kigali.

Ku ruhande rwe Senderi yatangaje ko imwe mu mpamvu abona ituma abahanzi benshi bataririmba indirimbo zivuga ku gihugu ari uko abenshi batazi Uturere ndetse na zimwe mu Ntara zigize u Rwanda.

Mu gikaniro yagiranye na Umuseke, International Hit yatangaje ko abahanzi benshi atabaveba kuko batazi bimwe mu bigize igihugu birimo ahantu nyaburanga.

Yagize ati “ Ese nk’umuhanzi utari wagera, Ku Nkombo, Ku mashyuza, Ipindura, Mu bweyeye, Muri mbyo, Mu rukari, Ku rutare rwa Ndaba, Mu Bukomane bwa Nyakayaga, Matimba, Cyanjuna, Mu Kinigi, i Ndiza, Ku Mukindo wa makwazo, i Kibeho, Mu Kagera, ubwo azaririmba iki?

Ni byiza ko niyo waba utaririmba indirimbo zisanzwe uririmba indirimbo z’urukundo ko umenya amwe mu mateka yaranze Uturere tumwe na tumwe tw’igihugu cyawe”.

Senderi yakomeje avuga ko atemeranya n’abantu bagereranya muzika nyarwanda ndetse n’ibindi bihugu byo muri Afurika y’Iburasirazuba. Kuko ngo amateka u Rwanda rwanyuzemo mu 1994 iyo ataba wenda ruba rugeze ku rwego mpuzamahanga. Ariko kubera ayo mateka igihugu cyanyuzemo ahubwo ntako abahanzi batagize ngo bongere bubake imyidagaduro.

Iyi niyo ndirimbo Senderi aheruts gushyirira hanze amashusho yayise “Icyumvirizo”.

[youtube url=”https://www.youtube.com/watch?v=9xnYDyquzzE&feature=youtu.be” width=”560″ height=”315″]

Joel Rutaganda

UM– USEKE.RW