Uganda: Umuntu yishwe n’indwara imeze nka Ebola yitwa Marburg

05 Ukwakira – Ni indwara ya Virus yitwa Marburg ifite ibimenyetso by’umuriro w’igikatu no kuva amaraso (hemorrhagic fever virus). Ku rubuga rwa Twitter ya Perezida Museveni kuri iki cyumweru nimugoroba yatangaje ko Minisiteri y’ubuzima yemeje ko habonetse umuntu wazize iyi virus.

Iyi ndwara yandurira mu gukoranaho nayo, yatumye Perezida wa Uganda asaba abaturage kwirinda gukorakoranaho bahana ibiganza ndetse no gufatanya n’abakozi b’ubuzima.

Perezida wa Uganda avuga ko yasabye Minisiteri y’ubuzima guhita ikwirakwiza amakuru ku baturage ngo birinde.

Ubu Minisiteri y’ubuzima muri Uganda iri gukurikirana abantu bose, barimo na bene wabo wa nyakwigendera, bashobora kuba barakoranyeho nawe, ndetse basabye abantu bose kuranga umutnu waba ukekwaho ibimenyetso by’iyi virus.

Marburg Virus yabonetse bwa mbere mu Budage mu mijyi ya Marburg na Frankfurt ndetse no muri Belgrade muri Yugoslavia ahagana mu 1960.

Minisiteri y’ubuzima muri Uganda yatangaje ko abantu bagera kuri 80 bashobora kuba barakoranyeho n’uwishwe n’iyi ndwara, kuva muri Nzeri 2014.

Iyi ndwara iri mu zikomeye eshanu ziterwa na Virus ziri mu bwoko bumwe na Ebola imaze iminsi ica ibintu muri Africa y’iburengerazuba.

Si ubwa mbere iyi ndwara ibonetse muri Uganda kuko kuva mu 2000 yagiye iboneka ahantu hatandukanya mu turere twa  Gulu (2000), Bundibugyo (2007), Luwero (2011), Kibaale (2012), Luwero (2012) nk’uko ibi bitangazwa na Chimpreports.

Ibiranga iyi ndwara harimo umuriro mwinshi, kuruka, gutakaza ubushake bwo kurya, kubabara umutwe no mu nda, umunaniro, guhitwa biza no gukurikirwa no kuva amaraso ahantu hatandukanye hari imyenge ku mubiri.

Muri Uganda ntabwo bizwi neza icyaba cyarateye iyi ndwara kimwe na Ebola yigeze kuhagaragara mu myaka ishize.

Gusa bikekwa ko izi ndwara zishobora kuva ku nyamaswa zizirwara zikanduza abantu maze indwara igakwira.

Muri Africa, Marburg virus yagaragaye mu bihugu bya Africa y’Epfo (1975), Kenya (1980 na 1987), DRCongo (2000), Angola (2004-2005) na Uganda.

Aho yishe abantu benshi kugeza ubu ni muri Angola aho yisha abantu 227 kuri 252 bari bayanduye. Muri DR Congo aho yishe 128 kuri 154 bari banduye, naho muri Uganda ikaba imaze kwica abantu 12 ubu kuva mu 2007.

UM– USEKE.RW