Pte Munyambabazi arasaba imbabazi imiryango yahemukiye na RDF

Gicumbi – Urubanza rwa Pte Theogene Munyambabazi warashe abantu batanu bagapfa rwongeye gusubukurwa kuri uyu wa 18 Nzeri, mu iburanisha ryabereye munzu mberabyombi y’Akarere ka Gicumbi, uyu musirikare yavuze ko asaba imbabazi imiryango yiciye abayo ndetse n’ingabo z’u Rwanda abarizwamo.

Uru rubanza ruri ruburanishwa n’abasirikare. Umushinjacyaha yatangiye asobanura uko uregwa yakoze icyaha biturutse ku makimbirane yagiranye n’abo bari bahuriye mu nzu y’imyidagaduro mu mujyi wa Gicumbi.Akaba aregwa ubwicanyi bugambiriwe.

Umushinjacyaha yasobanuye ko Pte Munyambabazi yarashishije abo yishe imbunda ya SMG 1337 yari asanzwe akoresha nk’umusirikare, ibi ngo yabikoze nyuma y’uko DJ n’abandi bamusohoye muri iyi nzu y’urubyiniro n’akabari.

Umushinjacyaha asobanura ko uyu musirikare yafunguye amasasu menshi mu kabari karimo abantu barenga 20, akavuga ko abarokotse atari ku mbabazi za Munyambabazi ahubwo ari amahirwe bagize.

Munyambabazi arashinjwa gukora iki cyaha bigambiriwe kuko yakoze urugendo ava mu kabari ajya kuzana imbunda mu kigo yabarizwagamo nk’uko bitangazwa n’umunyamakuru w’Umuseke wari muri uru rubanza.

Umushinjacyaha avuga kandi ko uyu musirikare atari yasinze kuko yari yanyoye Pt Mutziig eshatu mu kabari kitwa Golf, akanywa n’indi imwe aha mu nzu y’imyidagaduro ya Hunters ari naho yakoreye icyaha. Izi nzoga ngo zikaba atari zo zaba zaratumye akora icyaha.

Umushinjacyaha avuga kandi ko mu ibazwa uregwa we ubwe yemeye ko yashakaga kurasa abantu batatu, kandi abizi neza ko imbunda itarasa amashaza ahubwo irasa amasasu yica.

Ubushinjacyaha bukaba bwamusabiye igihano cyo kwamburwa impeta za gisirikare no gufungwa burundu.

Munyambazi ahawe umwanya yisobanuye avuga ko atari agambiriye kurasa abantu benshi ahubwo yashakaga kurasa abantu batatu gusa bari bashyamiranye nawe kandi ngo nabo atari asanzwe azi.

Uyu musirikare ati “Ariko ndasaba imbabazi imiryango yabo narashe ndetse n’ingabo z’igihugu.”

Umwunganizi ararega Leta

Mu rukiko hagaragaye abunganizi mu mategeko bane baburana indishyi ku miryango yabuze ababo.

Umwe mu bunguranira imiryango y’abagizweho ingaruka n’ubu bwicanyi yavuze mu rukiko ko arega Leta ko yagize uruhare muri ubu bwicanyi kuko yakoze ‘recrutement’ y’uyu Munyambabazi mu 2008, kuba baramenye imyitwarire ye mibi ntihagire icyo bakora, ndetse anashinja RDF uburangare kuri uyu musirikare.

Uyu mwunganizi kandi ararega uburangare abashinzwe umutekano w’ikigo yabagamo aho yagiye kuzana imbunda ntibamubone.

Akavuga kandi ko iyi mbunda yicishije abantu yayihawe mu rwego rw’akazikuko ngo nta kuntu yari kuyibona kuko iyo barangije akazi bazibika hamwe, ndetse we by’umwihariko bari bazi ko yagiye hanze atari mu kazi.

Urukiko rwavuze ko uyu musirikare afata akanajyana imbunda atanyuze mu nzira aandi basanzwe bacamo bityo ibyo bitakwitwa uburangare bw’abacunga umutekano kuko kuri buri giti hatashyirwa umusirikare.

Uyu mwunganizi arasaba indishyi zingana na miliyoni 200 kuko uyu musirikare atubahirije ingingo ya kabiri y’itegeko teka rya Perezida wa Republika No33/01 ryo mu 2012 rigena imitunganyirize n’inshingano z’ingabo z’igihugu.

Izi ndishyi ngo zikwiye gutangwa na Leta kuko uyu musirikare ari umukozi wa Leta. Ati “Kandi uyu yari mu kazi ntabwo yari muri Conje”

Abacamanza banzuye ko uru rubanza ruzasomwa tariki 06 Ukwakira 2014.

Evence NGIRABATWARE
UM– USEKE.RW/Gicumbi