Imirenge izajya itanga amasoko ya Leta atarengeje miliyoni 10

Umuyobozi mu Kigo cy’igihugu gishinzwe gutanga amasoko ya Leta(Rwanda Public Procurement Authority), Nsengiyumva Edison yabwiye abitabiriye amahugurwa azamara iminsi ibiri(15-17, Nzeri) ari kubera i Muhanga ko ubu ibigo by’ubuzima, n’imirenge igize aka karere bifite uburenganzira bwo gutanga amasoko atarengeje agacio ka miliyoni 10.

Yasabye abatanga amasoko ko bagomba kubaha umutungo wa Leta kandi bagakurikiza amategeko agenga itangwa ry’amasoko mu Rwanda.

Ubusanzwe  Minisiteri, ibigo bya Leta, n’izindi nzego zitandukanye  za leta kugeza ku turere nizo zari zifite mu nshingano zazo gutanga amasoko,  ariko kuva umwaka ushize Ikigo cy’igihugu  gishinzwe  gutunganya amasoko,  cyasohoye amabwiriza y’uko  imitangire y’amasoko igomba kumanuka ikegerezwa  inzego z’imirenge, ibigo nderabuzima n’ibindi bigo bya Leta  bikorera mu turere.

Nk’uko byavuzwe na Nsengiyumva Edison, kuva aho aya amabwiriza asohokeye,  hari imirenge yahise  iyashyira mu bikorwa ariko itarahabwa ubushobozi.

Ubu ngo ikigamijwe n’uko  abagize akanama   gashinzwe gutanga amasoko  ku mirenge no mu bigo nderabuzima barushaho kumenya amabwiriza  agenga imitangire y’amasoko  kugira ngo babashe kwirinda amakosa akunze gukorwa  mu mitangire yayo bityo bakamenya inzira binyuramo kandi bakazubahiriza.

Renzaho Daniel, Umukozi mu Kigo nderabuzima cya Nyamiyaga mu Karere ka  Kamonyi,  akaba n’umwe mu bagize akanama gashinzwe amasoko avuga ko  akurikije inshingano zindi  basanganywe  bagombye guhabwa agahimbazamuskyi kuko bakora inama nyuma y’amasaha y’akazi kandi bikaba ngombwa ko bataha  batinze kandi amakosa ashingiye ku byemezo bafashe nibo bayabazwa bityo akifuza ko bajya bahemberwa izo nshingano z’inyongera.

Umunyambanga Nshingwabikorwa w’akarere ka Kamonyi,  Bahizi Emmanuel yamaze impungenge aba bagize akanama k’amasoko kuko ngo hari itegeko rusanzwe ribemera agahimbazamusyi.

Yabasabye kunoza imikorere yabo bityo amakosa yagaragaye ahandi mu gutanga amasoko ntazabagereho. Kuri we ngo icya mbere abagize aka kanama bagomba kwitaho ni uguha amahirwe angana abapiganirwa gutsindira amasoko..

Abakozi 5 nibo  bashinzwe akanama k’amasoko mu mirenge no mu bigo nderabuzima, gusa itegeko riteganya ko Umunyamabanga Nshingwabikorwa w’Umurenge, Umucungamari, n’umukozi ushinzwe irangamimerere batagomba kuba muri aka kanama k’amasoko.

Ibihumbi 51, 000 by’amafaranga y’u Rwanda niyo yagenwe nk’ agahimbazamusyi  abashinzwe imitangire y’amasoko  ku rwego rw’akarere bagomba guhabwa.

MUHIZI ELISEE

UM– USEKE.RW/Muhanga.