Umuhanzi, Umunyamakuru, Producer, ninde ukwiye gukundisha igihangano abantu?

Benshi mu bantu bakurikirana ibijyanye na muzika mu Rwanda usanga bibaza imwe mu mpamvu ituma umuhanzi ahita azamuka akamenyekana cyane kurusha uwo asanze yaratangiye muzika mbere ye.

Iki ni kimwe mu bibazo bigenda byibazwaho n’abantu batari bake, gusa ugasanga abenshi batemeranya ku muntu wakabaye agira uruhare rwa mbere mu gutuma igihangano cy’umuhanzi runaka gikundwa.

Mu kigereranyo cyakozwe na Basile Uwimana umunyamakuru kuri Radio10, yagerageje gukagaragaza uko buri ruhande rwakabaye rwitwara mu kazi rushinzwe.

Yagize ati “Umuhanzi atekereza amagambo yo kuririmba mu ndirimbo ye bitewe n’icyo ashaka kuririmba. Ashobora kuririmba k’urukundo cyangwa se ubuzima busanzwe.

Agomba gutekereza uko indirimbo ye ashaka ko icurangwa “melody” ndetse n’injyana ashaka “Style”. Akazi gasigaye kakaba ari aka producer ugiye kubihuza byose akavanamo indirimbo.

Indirimbo iyo imaze kurangira ishyikirizwa umunyamakuru cyangwa umu Dj kugirango isakazwe ahantu hose. Gusa rimwe na rimwe ugasanga harashinjwa umunyamakuru kuba adacuranga indirimbo y’umuhanzi”.

Mu kiganiro yagiranye na King James umwe mu bahanzi bakunzwe cyane mu Rwanda mu njyana ya R&B na Pop, yatangaje uko we abyumva nk’umuhanzi.

Yagize ati “Hari imyumvire iri mu bantu izwiko umunyamakuru cyangwa umu Dj ariwe wagakwiye gukundisha indirimbo abantu bazayumva, nyamara ukirengangiza wa muhanzi wayanditse.

Ku ruhande rwanjye nsanga akazi ka mbere na mbere kagakozwe n’umuhanzi. Kuko iyo ndirimbo nuyandika witonze kandi ugakoresha amagambo afite icyo asobanurira ingeri z’abantu bazayumva byanga bikunda izakundwa.

Ntabwo akazi kareba produce, umunyamakuru cyangwa umu dj. Oyaaaa!! Ese ya ndirimbo nikundwa ugatangira kwitabira ibitaramo ninde bizagirira inyungu?”.

Nyuma y’iki kigereranyo ese wowe wumva hagati y’umuhanzi, umunyamakuru, producer na Dj ninde ufite uruhare runini mu gukundisha igihangano abazacyumva?

Joel Rutaganda

UM– USEKE.RW