Kenya: Mu mirwano ikaze Intare 3 zishe ingona muri Pariki

Umwe muri ba mukerarugendo witwa Kai Banks yafashe amafoto y’intare eshatu zica ingona muri Pariki ya Samburu muri Kenya. Izi ntare zanze kurya inzovu yari hafi aho yapfuye zihitamo kujya kwica ingona yari mu mazi hafi n’intumbi y’iyo nzovu. Izi ntare eshatu ubona ko zikiri nto,zabashije kwica iyi ngona nini yo mu bwoko bita Nile crocodiles.

Igice cya mbere cy’imirwano cyarangiye impande zombi zaguye miswi, Intare zibaye nk’izifata akaruhuko mu gusagarira iyi ngona itari kubona uko ihita yinjira amazi ngo icike ubu bugizi bwa nabi bw’Intare.

Ku cyiciro cya kabiri  ari nacyo cya nyuma intare uko ari eshatu zasumiye ingona biragundagurana, ariko izi ntare zishinga amenyo ingona icya rimwe ibura iyo yikiza n’iyo ireka iracogora.

Uko zakomezaga gushinga amenyo niko ingona yacikaga intege kugeza intege zishize irapfa.

Intare ariko umenya habamo n’ubwirasi kuko nyuma yo kwivugana inzovu yari igaramye hafi aho ntiziyakure, n’iyi ngona ntabwo zigeze ziyirya. Ahubwo zisubiriye kuri ya nzovu zinywera amaraso, zinakuraho intama z’iminopfu zoroshye ibindi zigasigira za mahuma nk’uko bikunda kugenda.

Ubundi ntibisanzwe ko intare cyangwa indi nyamaswa y’inkazi itinyuka kurwana n’ingona kubera ko bigoye kuyica kubera umubiri wayo worosheho amagaragamba akomeye ndetse n’urwasaya rwayo rurerure rurimo amenyo maremareakomeye.

Izi nyamaswa zo mu mazi ariko Intare ntizikunda no kuzihiga kuko akenshi zihita zibira mu mazi. Gusa uko bigaragara ni uko iyo Intare ziziciye urwaho ziba zishaka kwerekanako Intare atari umwami w’ishyamba gusa amazi nayo zishobora kugenzura ibiyarimo.

Mailonline

 UM– USEKE.RW