Birori Daddy yahagaritswe by'agateganyo mu mikino yose CAF itegura

Nyuma y’uko ishyirahamwe ry’umupira w’amaguru mu gihugu cya Congo Brazzaville rireze umukinnyi w’ikipe y’igihugu Amavubi Birori Daddy, ariko ukoresha amazina ya Taggy Etekiama iyo ari iwabo muri Repubulika Iharanira Demokarasi ya Congo (DRC) rimushinja gukoresha imyirondoro itandukanye, Ishyirahamwe ry’umupira w’amaguru ku mugabane wa Afurika (CAF) ryabaye rihagaritse by’agateganyo uyu mukinnyi  mu mikino yose ritegura mu gihe kitazwi.

Radio Okapi ivuga ko ubu Birori Daddy adashobora gukinira ikipe ye ya V.Club n’Ikipe y’igihugu y’u Rwanda, kubera guhagarikwa by’agateganyo, mu gihe CAF itarafata umwanzuro wa nyuma kuri iki kibazo.

Uyu mwanzuro wamenyeshejwe Ishyirahamwe ry’umupira w’amaguru muri DRCongo (FECOFA) ejo kuwa gatatu tariki 13 Kanama, nyuma y’uko Birori Daddy yitabye ku cyicaro cy’ishyirahamwe ry’umupira w’amaguru muri Afurika “CAF” i Cairo mu Misiri, nyuma y’umukino V.Club yatsinzemo Zamalek (1-0) mu mpera z’icyumweru gishize.

Bonny Mugabe, umuvugizi w’Ishyirahamwe ry’umupira w’amaguru mu Rwanda (FERWAFA) yabwiye Umuseke ko ayo makuru batarayamenyeshwa na CAF, gusa ngo nibaramuka babonye ibaruwa ibimenyesha bazabitangariza itangazamakuru n’Abanyarwanda muri rusange.

Birori Daddy ni umwe mu bakinnyi bari bitezweho gufasha ikipe y’igihugu Amavubi mu mikino y’amatsinda izatangira mu kwezi gutaha kwa Nzeli, no gufasha ikipe ye ya V.Club ubu igeze mu mikino ya 1/2 y’imikino ihuza amakipe yabaye aya mbere iwayo “Orange CAF Champions league”.

Mu gushaka ticket yo kujya mu gikombe cya Africa kugeza ubu, mu bafite ibitego byinshi uza imbere ni Stéphane Sessègnon wa Benin ufite bine (4) agakurikirwa na Daddy Birori na Gabadinho Mhango wa Malawi bombi bafite bitatu.

Kanda HANO usome inkuru irambuye igaragaza uko ikirego giteye.

Nkurunziza Jean Paul
UM– USEKE.RW