Nyanza: Abayobozi 4 ku rwego rw’uturere bahembewe gutanga amakuru

Ejo mu muhango wabereye mu kicaro cy’Akarere ka Nyanza, Ubuyobozi bw’Intara y’Amajyepfo bwahembwe abayobozi b’uturere twa  Nyaruguru, Kamonyi, Gisagara, na Nyanza kubera  gukorana neza n’itangazamakuru. Guverineri w’Intara  y’Amajyepfo Munyantwari Alphonse yavuze ko gutanga amakuru atari imbabazi ko ahubwo  ari itegeko n’inshingano z’abayobozi.

Muri uyu muhango wo gushimira bamwe mu bayobozi kubera  uruhare n’ubushake bagaragaza mu gutanga amakuru wabereye mu karere ka Nyanza, abanyamakuru n’abayobozi ku rwego rw’uturere n’Intara bunguranye ibitekerezo  ku byatuma imikorere n’imikoranire hagati y’abayobozi n’abanyamakuru inozwa.

Ndekezi Eugene Umuyobozi wa Radio Huguka, ari nawe wateguye iki gikorwa abifashijwemo n’abanyamakuru  bakorera  ibitangazamakuru bitandukanye byo mu Ntara y’Amajyepfo, avuga ko hari  ibyo bagendeyeho kugira ngo babashe guhemba  no gushimira abayobozi ku rwego rw’uturere kubera ubufatanye n’abanyamakuru.

Ndekezi yanenze kandi acyaha bamwe mu bayobozi badatanaga amakuru arebana n’ibyo bashinzwe.

Yagize ati: “Nubwo hari amategeko  yashyizweho asaba abayobozi mu ngeri zinyuranye  gutanga amakuru,  usanga hari abatarabyumva kugeza ubu  ku buryo gutanga amakuru bisa no kubinginga ariko twe turashima aba bayobozi  badufashije  kubona amakuru mu buryo bwihuse.”

Karekezi  Léandre, Umuyobozi w’Akarere ka  Gisagara waje ku mwanya wa 3 mu bayobozi bahawe ibihembo, yavuze ko hari igihe Umuyobozi  rimwe na rimwe aba  atazi amakuru y’ibibera mu gace ayobora ahubwo  akayabwirwa n’abanyamakuru  kuko ari bo  baba hafi y’abaturage.

Yasabye abayobozi bagenzi be ko bajya baha agaciro ibibazo babazwa n’abanyamakuru ku makuru runaka batari bazi kuko nabo bibafasha kumenya uko ikibazo kimeze no kugikurikirana vuba.

Guverineri w’Intara y’Amajyepfo Munyantwari Alphonse, we asanga gutanga amakuru bidakwiye kwitwa imbabazi ahubwo ko  ari itegeko ku bayobozi.

Yasobanuye ko iri tegeko rishingiye ku mahame agenga imiyoborere myiza kandi ngo iyo abayobozi batanze amakuru biba ari urugero rwiza kuri bagenzi babo bityo abaturage nabo bakamenyeshwa ibibakorerwa.

Mu turere 8 tugize Intara y’Amajyepfo, 4 muri two nitwo twahawe ibihembo, umwanya wa  mbere  wegukanywe   na Habitegeko Francois, Mayor w’Akarere ka Nyaruguru, akurikirwa  na Rutsinga  Jacques  Mayor wa Kamonyi,  ku mwanya wa 3  hakurikiyeho  Karekezi Léandre  Mayor wa Gisagara, naho ku mwanya wa  wa 4 haza  Murenzi Abdallah Umuyobozi w’Akarere ka Nyanza.

Abitabiriye iyi  nama nyunguranabitekerezo  basabye ko ibiganiro  nka biriya byajya bikorwa buri  mwaka ,  kuko  abayobozi mu rwego rwo kunoza imikoranira hagati y’abayobozi n’abanyamakuru  bose baharanira ineza y’umuturage.

MUHIZI ELISEE

UM– USEKE.RW/Nyanza.