Christopher yakoze indirimbo ya mbere yo kuri album ya kabiri

Muneza Christopher ukora injyana ya R&B na Pop, yashyize hanze indirimbo ya mbere izajya kuri album ye ya kabiri nyuma y’aho amurikiye album ye ya mbere yise ‘Habona’.

Christopher ukorera muzika muri Kina Music, yinjiye muri iyi nzu bwa mbere mu mpera z’umwaka wa 2009, ahakorera indirimbo ye ya mbere yise ‘Amahitamo’, gusa iyo ndirimbo ntabwo yigeze imenyekana cyane.

Nyuma y’aho gato nibwo yakoranye n’umuraperi witwa Danny Nanone indirimbo bise ‘Iri joro’ yaje gutuma amenyekana cyane ndetse atangira gutumirwa mu bitaramo.

Tariki 15 Gashyantare 2014 muri Gashyantare nibwo Christopher yamuritse album ya mbere ayita ‘Habona’ yari iriho indirimbo zigera ku 10.

Mu ndirimbo zakunzwe cyane za Christopher harimo, Habona, Ndabyemeye, Babyumva  n’izindi.

Ishimwe Clement umuyobozi wa Kina Music wafashije Christopher kuzamuka muri muzika ye, avuga ko ubu kandi bari mu biganiro ngo basinye amasezerano n’umuhanzi Gisa cy’Inganzo nawe aze muri Kina Music.

Christopher w’imyaka 22 nyuma yo kuzamura muzika ye yahise yinjira mu bahanzi 10 bakunzwe mu gihugu bari mu marushanwa ya PGGSS nubwo atakomeje muri batatu ba mbere.

Ni umuhanzi witegura gutangira amashuri ye ya Kaminuza nyuma yo kurangiza amashuri yisumbuye mu mwaka w’amashuri ushize.

Joel Rutaganda

UM– USEKE.RW