Muhanga: Niyigaba ubusizi bwe bumaze kumuteza imbere

Niyigaba Francois  bakunze kwita Gasizi ka Sinza,   afite imyaka 36 y’amavuko afite umugore n’abana 2 atuye mu kagari ka Gahogo, umurenge wa  Nyamabuye  mu karere ka Muhanga,  yatangarije UM– USEKE ko  impano yo  guhimba  imivugo,   imaze kumuteza imbere  akavuga ko yifuza  kuzayiraga  bamwe mu muryango we.

Mu kiganiro kirambuye  Niyigaba Francois  yagiranye n’umunyamakuru wa UM– USEKE,  yavuze  ko   yatangiye  iyi mpano ye y’ubusizi akiri  mu mashuri abanza,  ariko ngo  akumva  kubishyira mu bikorwa ari ibintu  bitamufasheho  kubera ko  yari akiri muto cyane.

Nyuma ngo  atangiye amashuri yisumbuye, haje kubaho  amarushanwa  y’imivugo  ku bubi bwa SIDA,  mu kigo yigagamo  bagiye gutangaza  amanota asanga niwe wegukanye umwanya wa mbere  ku rwego rw’ amashuri  kugeza  ku Ntara bamuha igikombe.

Mu rwunge rw’amashuri rwa Shyogwe ari naho uyu Niyigaba yakomereje amashuri  ye yisumbuye, naho byaje kuba ngombwa ko abanyeshuri  bakina ikinamico,  nabyo ngo  yarabigerageje kuko yumvaga  izi mpano zose azifite,  naho aba uwa mbere  ndetse  ikinamico zose yagendaga akina  zarushagaho gukundwa n’abantu babaga bazumvise  ku buryo buri mwaka yagombaga  kubona  ibihembo binyuranye  kugeza arangije  amashuri yisumbuye  yose.

Niyigaba  avuga ko yaje guhimbarwa cyane  ikigo cy’imisoro n’amahoro( RRA)  kimusabye   we n’abandi bagenzi be  guhimba umuvugo  ushishikariza abaturage gutanga imisoro,   umuhango wagombaga  kubera kuri Stade  Regional  ya Kigali I Nyamirambo  harimo n’abayobozi bakuru b’igihugu  akabikora nk’imwe mu nzira  ifasha  abayobozi  kwesa imihigo baba bemereye abaturage,  aho naho  akegukana igikombe.

Uyu  musizi  Niyigaba   avuga ko   yahimbye umuvugo abantu benshi bakunze   mu matora  y’umukuru w’igihugu yabaye mu mwaka wa  2010 yifuza  kuwutura  Perezida wa Repubulika kubera ko  ari we  yashakaga ko atsinda, uwo muvugo  yawise  ‘’ Amahitamo yoroshye’’ ashaka kuvuga ko  ibikorwa  Umukuru w’igihugu amaze kugeza  ku banyarwanda ari indashyikirwa ku buryo  kumuhitamo mu bandi bakandida byoroheye  abatora kuko ngo ibikorwa  bye byivugira.

Niyigaba  yakomeje avuga ko umuvugo wa  3   yongeye kuwutura  Umukuru w’igihugu ubwo  yasuraga  akarere ka Muhanga mu murenge wa  Kiyumba,   nabwo  akabwira  abaturage  n’abanyamahanga  batazi neza u Rwanda uruhererekane rw’ibikorwa amaze gukora  mu myaka amaze  ku buyobozi bitangaza benshi.

Niyigaba ngo   guhimba imivugo  yabihinduye umwuga  kuko  ngo buri wa 6  mu bukwe  bwo gusaba no gukwa, kuvugira inka,   basigaye bamwiyambaza  naho akahakura  amafaranga amutunga we n’umuryango we,  bikaba byaramufashije kubona icumbi  abamo  ndetse n’imodoka agenderamo.

Niyigaba  Francois  arangiza avuga ko  iyo avuga umuvugo  w’iminota  hafi 40   awuvuga  atiyambaje inyandiko aba yawuteguriyeho kubera ko biba biri mu mutwe we byose.

Iyi mpano  yifuza ko n’abamukomokaho  bayisigarana  mu gihe azaba ageze mu zabukuru,  gutegura umuvugo no kuwuvuga  abibangikanya n’indi mirimo  asanzwe akora kuko  ari we Uyobora Agaseke Banki  ishami rya Muhanga.

MUHIZI ELYSEE

ububiko.umusekehost.com/Muhanga.