U Rwanda ruri ku isonga mu kwandikisha ubutaka muri Afurika – Min Busingye

Mu muhango wabaye ejo wo kurahiza  abakozi bashinzwe iby’ubutaka  ku rwego rw’Intara, Uturere,  ndetse n’Imirenge, wabereye ku biro  by’Akarere ka Nyanza, Minisitiri  w’ubutabera Busingye Johnson, yavuze ko  u Rwanda ruza ku mwanya wa mbere mu bihugu by’Afurika  mu birebana no kwandikisha ubutaka.

Uyu muhango wo kurahiza  abakozi 94 bashinzwe umurimo wo kwandikisha ubutaka, Minisitiri w’ubutabera  Busingye  Johnson,  yabanje kugaruka  ku  bibazo  byagiye bigaragara hirya no hino  mu turere  bijyanye n’ubutaka, aho imwe mu miryango  yageraga aho yicana, buri wese  ashaka kwikubira umutungo  w’ubutaka.

Busingye  avuga ko muri Afurika,  u Rwanda  rwabonye umwanya wa mbere bitewe no korohereza abaturage  kwandikisha ubutaka  kugira ngo  ibibazo nk’ibi bigabanuke mu baturage, ari nayo mpamvu  bifuza ko  uru rwego rwahera ku ntara rukagera ku mirenge.

Yagize ati:’’ Mbere ya Jenoside yakorewe Abatutsi 1994, habaga noteri umwe gusa mu gihugu, kuri ubu mu Rwanda twifuza ko baba benshi kandi bafite inshingano zitandukanye, kuko uko igihugu gitera imbere ni nako imirimo y’abanoteri yiyongera.’’

Mukagashugi Marie Chantal ushinzwe  ubutaka mu Karere ka Nyanza,  yavuze ko  hari bimwe mu bibazo  bakundaga kwakira  ariko bakabura uko  babikemura kubera ko nta nshingano zihariye  babaga bafite,  kuri ubu ngo bagiye kuzajya babirangiza  badategereje ko bibanza  koherezwa  ku ntara.

Sagashya  Didier ni umuyobozi wungirije  mu kigo gishinzwe  umutungo kamere. Uyu mugabo  avuga ko  bifuje gushyiraho aba bakozi  bazajya bakora umurimo wa Noteri  mu by’ubutaka  mu rwego rwo kugabanya imirongo y’abaturage batondaga ku karere bajya  kwandikisha ubutaka ugasanga indi mirimo bakoraga idindira.

Mu ijambo rye yagize ati: “Aba bakozi ntabwo baje gusimbura  ba Noteri bandi ku rwego rw’uturere n’imirenge,  aba bazaba bashinzwe  kwemeza no gushyiraho umukono  ku byangombwa by’ubutaka gusa.’’

Iki cyiciro cy’abakozi bashinzwe umurimo  wa Noteri  mu birebana n’iby’ubutaka  kikaba kibaye icya mbere,  biteganyijwe ko  hazakurikiraho abandi bakozi  bafite izi nshingano, ku rwego rw’imirenge  isigaye. u Rwanda kandi ruza ku mwanya wa 8 ku rwego rw’Isi mu bijyanye n’iyandikisha butaka.

MUHIZI ELISEE

ububiko.umusekehost.com/Nyanza.