Gereza ya Rubavu yafashwe n'inkongi. Batatu bitabye Imana

Updated 6.50PM: Itsinda ry’ingabo n’imodoka izimya umuriro bageze kuri Gereza batangira kuyizimya, nyuma y’iminota 15 umuriro wari umaze kuzima. Amakuru avuga ko hari abagororwa bakomerekeye muri iyi nkongi.

Umuyobozi w’Akarere ka Rubavu yatangarije Radio Rwanda ko abagororwa batatu bitabye Imana abagera kuri 40 barakomereka mu mubyigano wo kugerageza guhunga ahari umuriro muri gereza.

07/07/2014  7.59PM: Ahagana saa kumi n’imwe z’umugoroba kuri uyu wa mbere tariki 07 Nyakanga nibwo igice kimwe cya Gereza nkuru ya Rubavu cyafashwe n’inkongi y’umuriro itaramenyekana icyayiteye kugeza ubu. Umuyobozi w’iyi gereza yabwiye Umuseke bakiri gukiza ubuzima bw’abantu ubu ntacyo yatangaza.

Ntabwo biramenyekana icyateye iyi nkongi muri iyi gereza iherereye mu murenge wa Nyakiriba mu karere ka Rubavu.

Imirimo yo kuzimya umuriro hifashishijwe uburyo bushoboka niyo iri gukorwa, nta kizimyamoto yari yahahagera kuko izabugenewe ziri i Kigali.

Ntakirutimana Eric, Umuyobozi w’agateganyo w’iyi Gereza yabwiye Umuseke ko bataramenya icyateye iyi nkongi, icyo bari gukora ari ugukura abagororwa n’ibyabo aho umuriro wibasiye mu gice kimwe bashyirwa aho umuriro utageze, ibindi abitangaza nyuma.

Hashize ukwezi kumwe gusa gereza ya Muhanga nayo yibasiwe n’inkongi y’umuriro yatewe na ‘installation’ y’insiga z’amashanyarazi.

Gereza ya Rubavu ni imwe muri gereza 13 ziri mu Rwanda, ikaba imwe muri gereza nshya ziri mu gihugu. Ifungiwemo abagororwa bagera ku bihumbi bitatu.

Photos/Eddy R. Sabiti/UM– USEKE

Patrick Maisha
ububiko.umusekehost.com/Rubavu