Mutuelle de Santé igiye gushyirwa muri RSSB ngo imisanzu icungwe neza

Gakwaya Innocent umuyobozi wungirije w’ikigo cy’gihugu cy’ubwiteganyirize RSSB yatangaje kuri uyu wa 07 Nyakanga ko Serivisi y’Ubwisungane mu kwivuza vuba aha igiye gushyirwa mu kigo cya RSSB mu rwego rwo kunoza imicungire y’imisanzu y’abatanga mutuelle yakunze kurangwamo ibibazo. 

Kuri uyu wa mbere mu nama yahuje ibihugu bigize umuryango w’ibihugu by’Afurika y’iburasirazuba barebera hamwe ibijyanye n’ubuvuzi nibwo Gakwaya yavuze ko uyu mwanzuro uherutse no kwemezwa na guverinoma ushobora gushyirwa mu bikorwa mu gihe cya vuba.

Gakwaya avuga ko ikigamijwe mu guhuza Mutuelle de Santé na RSSB ahanini ari ugucunga neza imisanzu y’abatanga ubwisungane mu kwivuza no kureba uko serivisi bahabwa inozwa kuko ngo wasangaga ibitaro n’ibigo by’ubuzima bitishyurwa neza kuri serivisi baba bahaye abarwayi bivuje bakoresheje mutuelle.

Ubusanzwe imisanzu y’ubwisungane mu kwivuza yakirwa na ‘sections’ z’ubwisungane mu kwivuza zigera kuri 450, imicungire yayo ikaba yarakunze kuvugwamo sakwe sakwe, kuko ahanini ibitaro n’ibigo nderabuzima usanga ngo bitishyurwa uko bikwiye amafaranga y’abivurije ku bwisungane.

Gakwaya ati “Aya mafaranga ubu azajya ashyirwa muri RSSB abe ariyo yishyura abatanze serivsi z’ubuvuzi, ubu turi kwiga uko bikorwa kuko hakirimo ibibazo by’amategeko kuko hari agomba guhinduka.”

Kimwe mu bikomeye ariko byihutirwa ni uburyo bwo kwinjiza abaturarwanda barenga miliyoni 10 bari mu bwisungane mu kwivuza mu buryo bw’ikoranabuhanga batari barimo ubu. Abakoresha ubwisungane mu kwivuza bakaba bagirango nabo bakoresha uburyo bugezweho bw’ikoranabuhanga, ikindi kitoroshye ni ikigendanye n’abakozi bakoraga muri mutuelle de santé barimo abagomba kuzanwa muri RSSB nabo ngo hakaba amategeko abigenga agomba guhindurwa.

Gakwaya yasobanuye kandi ko nubwo abanyamuryango b’ubwisungane mu kwivuza bazinjizwa muri RSSB bitavuze ko serivisi bazahabwa zizaba zingana n’abo basanzemo.

Avuga ko niba umuntu atanga ibihumbi 80 ku mwaka, undi agatanga ibihumbi 80 ku kwezi undi agatanga ibihumbi bitatu ku mwaka, aba bose bari mu kigo kimwe bitavuze ko bazahabwa serivisi zingana kwa muganga nk’uko n’ubundi bisanzwe bigenda.

Daddy SADIKI RUBANGURA
ububiko.umusekehost.com