Radio & Weasel bagarutse i Kigali gutarama

 Abahanzi bagize itsinda rya Good Life aribo Radio & Weasel bagiye kugaruka gutaramira abanyarwanda mu giratamo cyateguwe na Show Time Events. Ni nyuma y’igihe gito aba bahanzi bavuye mu Rwanda mu gitaramo bari bazanyemo na The Ebonies nayo yari yaturutse mu gihugu cya Uganda.

Radio & Weasel ni abahanzi bakunzwe cyane muri aka Karere k’Afurika y’Iburasirazuba. Mu cyumweru gishize bari mu mujyi wa Mwanza mu gihugu cya Tanzania.

Mu kiganiro n’abanyamakuru kuri iki cyumweru umuyobozi wa Show Time Events yatangaje ko impamvu bahisemo kugarura aba bahanzi mu gihe gito cyari gishize bavuye mu Rwanda ari uko bakunzwe n’urubyiruko rwinshi.

Yagize ati “Ugereranyije n’abandi bahanzi bo mu bihugu duturanye usanga Good Life ifite imbaga y’urubyiruko itari nke ibakunda. Niyo mpamvu rero twahisemo kuba twabagarura”.

Abajijwe niba hari abandi bahanzi yaba yaragerageje kuvugana nabo Diamond wo mu gihugu cya Tanzania, yavuze ko ubushobozi bari bafite butabemerera kuba bahagurutsa Diamond.

Ati“Ibyo twabitekerejeho ariko dusanga ubushobozi dufite butapfa kuzana umuhanzi nka Diamond kuri iyi nshuro, ariko ubutaha birashobora”.

Biteganyijwe igitaramo cya Radio na Weasle i Kigali kizaba ku itariki ya 12 Nyakanga 2014 kuva saa kumi z’umugoroba kuri parking ya stade Amahoro i Remera. Kwinjira bikazaba ari 1 000frw naho mu myanya y’icyubahiro bikaba 5 000frw.

Abahanzi b’abanyarwanda bazaba bari muri icyo gitaramo ni, Urban Boyz, Bulldogg, Uncle Austin, Allioni, Social Mula, Two4Real na Kitty Joyce. 

ububiko.umusekehost.com